Հալածանքի ֆոնին անգամ եկեղեցու վարկանիշը չի ընկել։ Այսօր լրագրողների հետ զրույցում սոցիոլոգիական հարցումների արդյունքները ներկայացրեց «Արար» քաղաքակրթական հետազոտությունների հիմնադրամի գործադիր տնօրեն Արմեն Խաչիկյանը։ Նա նշեց, որ հոկտեմբերի 5–ից 25–ը անցկացված հարցմանը մասնակցել է 1123 մարդ։
«Այս հետազոտությունում մենք բաշխել ենք ըստ տարբեր սերունդների։ Գիտեք մինչև 11-28 տարեկանների սերունդը կոչվում է Z, պատկերացրեք, որ Z սերնդից ընդամենը 3․6 %–ն է, որ դժգոհ է եկեղեցուց, իսկ մնացածը գոհ են։ Փաստացի եկեղեցուց գոհունակությունը բավականին բարձր է ինչպես սովորաբար լինում է` մինչև 70 % »,– ասաց նա։
Խաչիկյանը նշեց, որ կոնկրետ հարցրել են` կմիանա՞ն եկեղեցու կողմից համախմբման կոչին, և շուրջ 45 տոկոսն «այո» է պատասխանել։
«Իսկ Z սերնդի շուրջ 68 տոկոսն է ասել, որ կմիանա, եթե եկեղեցին համազգային համախմբման կոչ անի։ Սա ևս կարևոր արձանագրում է` եկեղեցու հասցեին հնչող քննադատությունների ֆոնին»,– նշեց Արմեն Խաչիկյանը։
Միևնույն ժամանակ Խաչիկյանը նշեց, որ անկում չկա նաև կառավարության վարկանիշում։ Ըստ նրա՝ կառավարության գործունեությունից գոհ է 40 տոկոսը։
Հիշեցնենք` տևական ժամանակ է` ՀՀ իշխանությունը արշավ է սկսել նաև եկեղեցու ու հատկապես կաթողիկոսի դեմ։ Ճաղերի հետևում են «Սրբազան պայքար» շարժման առաջնորդ Բագրատ արքեպիսկոպոս Գալստանյանը, Շիրակի թեմի առաջնորդ Միքայել արքեպիսկոպոս Աջապահյանը, Արագածոտնի թեմի առաջնորդ Մկրտիչ սրբազանը և Արագածոտնի թեմի դիվանապետ Գարեգին Արսենյանը։
Sputnik Արմենիա
