Անտառային հրդեհներ են բռնկվել Լոռու մարզի Ֆիոլետովո գյուղի մոտակայքում: Այս մասին հայտնում է Հայաստանում Ռուսական տունը։
Ավելի վաղ հաղորդվել էր, որ արդեն մի քանի օր է՝ հրդեհներ են մոլեգնում Գեղարքունիքի և Տավուշի մարզերում։ Հրդեհի մի քանի օջախ է արձանագրվել։ Փրկարարներին դեռևս չի հաջողվում ամբողջությամբ վերացնել հրդեհները, այդ թվում՝ անտառային գոտում, սակայն նրանք կանխել են դեպի բնակավայրեր կրակի տարածման վտանգը:
Այժմ կրակը մոտեցել է Լոռու մարզին։
«Թունելից անմիջապես հետո, երբ մտնում ես Տավուշ, համատարած հրդեհների գիծ է․․․ Փորձանք է, կարճ ասած: Պետական ուղղաթիռը թռչում է, մարում, դե մենք էլ ամբողջ գյուղով փորձում ենք հաղթահարել արհավիրքը»,-հայտնել է Ֆիոլետովոյի մոլոկանների համայնքի ղեկավար Ալեքսեյ Չիչևը։
Նրա խոսքով՝ ինքը երբեք նման կրակ չի տեսել աշնանը, տեղի հնաբնակները նույնպես նման բան չեն հիշում։
Հրդեհը վախեցրել է նաև անտառի բնակիչներին։ Չիչևի նկարահանած կադրերում երևում է, թե ինչպես է արջը ձագերի հետ փորձում փրկվել։
Sputnik Արմենիա
