«Քաղաքացիական պայմանագիր» ներկայացուցիչները Մոլդովայի հետ սկսել են փորձի փոխանակման գործընթաց։ Այս մասին գրում է «Հրապարակը»` հավելելով, որ ՔՊ քարոզչական գծի պատասխանատու Վահագն Ալեքսանյանը Մոլդովայում է։ Կայքը հիշեցրել է, որ ՀՀ արտաքին գործերի նախարար Արարատ Միրզոյանը Բրյուսելում ԵՄ պաշտոնյաների հետ նոր գործակցության փաստաթուղթ է ստորագրել։
Ավելի վաղ հայտնել էինք, որ Հայաստան–Եվրոպական միություն գործընկերության խորհրդի 6-րդ հանդիպմանը ՀՀ արտաքին գործերի նախարար Արարատ Միրզոյանն ու Եվրամիության արտաքին գործերի և անվտանգության հարցերով բարձր ներկայացուցիչ Կայա Կալասը ստորագրել են համագործակցության նոր՝ ՀՀ-ԵՄ գործընկերության ռազմավարական օրակարգի փաստաթուղթը։ Ըստ այդմ՝ ԵՄ–ն ՀՀ—ին 15 մլն եվրո կտրամադրի ականազերծման հետ կապված աշխատանքների, ինչպես նաև հիբրիդային պատերազմի շրջանակում աջակցության շրջանակում։
Լրատվամիջոցը շեշտել է, որ Արևմուտքն արդեն անթաքույց հայտարարում է, որ մտադիր է աջակցել ՔՊ-ի վերարտադրությանը՝ կիրառելով Մոլդովայի սցենարը և ընտրական մանիպուլյացիաներով ամրագրելով Փաշինյանի հաղթանակը։ ՔՊ-ականներն արդեն փորձի փոխանակում են անում Մոլդովայի գործընկերների հետ:
Հիշեցնենք, որ ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Արևմուտքի և ԵՄ-ի ապակառուցողական ազդեցությունը Հարավային Կովկասում` նշել է, որ Եվրոպական միությունը փորձում է իր ազդեցությունը Հայաստանի վրա ուժեղացնել դրամաշնորհների, քաղաքական ճնշումների և տեղեկատվական մանիպուլյացիաների միջոցով: Զախարովան շեշտել է, որ Բրյուսելը Երևանին պարտադրում է նեոլիբերալ վերաբերմունք և ձգտում է հասարակության մեջ ձևավորել ռուսատյաց տրամադրություններ։
Sputnik Արմենիա
