Բռնազավթված Արցախում ոչնչացվում և վնասվում է մեր բազմադարյա հոգևոր-մշակութային ժառանգությունը։ Ինչպես հայտնում է Մայր աթոռը, այս հայտարարությունն արել է Ամենայն հայոց կաթողիկոս Գարեգին Երկրորդը Նիկիայի տիեզերաժողովի 1700-ամյակին նվիրված համաժողովի ժամանակ։
«Ապրելով Հավատամքն այսօր. Նիկիայի տիեզերաժողովի 1700-ամյակի հիշատակում» խորագրով միջեկեղեցական համաժողովը մեկնարկել է Մայր աթոռ Սուրբ Էջմիածնում։
«Նիկիական տիեզերաժողովը 1700 տարի անց համախմբել է ձեզ մի երկրում, որ անասելի հալածանքների, նեղությունների և փորձությունների է ենթարկվել հանուն Քրիստոսի։ Այսօր էլ մեր ժողովուրդը փորձությունների միջով է անցնում»,- իր բացման խոսքում ասել է կաթողիկոսը։
Նա անդրադարձել է 2020թ․ Ադրբեջանի կողմից սանձազերծված պատերազմին, որի հետևանքով հազարավոր հայորդիներ զոհվեցին ու հաշմանդամ դարձան, իսկ 2023 թվականին Արցախից բռնի տեղահանվեց ողջ բնակչությունը։
Վեհափառ հայրապետն ընդգծել է, որ Ադրբեջանում այսօր է շարունակվում են ապօրինաբար պահվել Արցախի ռազմաքաղաքական նախկին ղեկավարներն ու այլ ռազմագերիներ։
«Բռնազավթված Արցախում ոչնչացվում և վնասվում է մեր բազմադարյա հոգևոր-մշակութային ժառանգությունը, պատմական սրբավայրերը, նաև յուրացվում ոչ հայկական լինելու կեղծ պատճառաբանությամբ»,- ասել է կաթողիկոսը` հավելելով, որ աշխարհում այսօր տիրող ցավալի պատկերի հանդիման առավել հրամայական է դառնում եկեղեցիների համագործակցության ոգու դրսևորումը, քանի որ միասնական ջանքերի միջոցով է հնարավոր կանխել եղեռնագործությունները, դադարեցնել դժբախտությունները։
Նշենք, որ սեպտեմբերի 4-7-ն անցկացվող համաժողովին մասնակցում են Հայոց եկեղեցու նվիրապետական աթոռների՝ Մեծի Տանն Կիլիկիո կաթողիկոսության, Կ․ Պոլսի և Երուսաղեմի Հայոց պատրիարքությունների, ինչպես նաև քույր եկեղեցիների, տարբեր հարանվանությունների և միջեկեղեցական կառույցների ներկայացուցիչներ։
Քառօրյա համաժողովին բանախոսություններով ու զեկույցներով հանդես կգան արևելյան ուղղափառ, ուղղափառ, կաթոլիկ, լյութերական և այլ եկեղեցիների, ինչպես նաև միջեկեղեցական կառույցների ներկայացուցիչներ։
Հավաքի նպատակն է համախմբել երիտասարդ հոգևորականների՝ համատեղ խորհելու եկեղեցու առջև ծառացած մարտահրավերների շուրջ, ուսումնասիրելու Նիկիական հավատամքի իմաստն ու արդիականությունը մեր օրերում և խթանելու եղբայրության ու համագործակցության ոգին։
Sputnik Արմենիա
