Ռադիոտեղորոշման իտալացի ինժեներ-մասնագետ Ֆիլիպո Բյոնդին հայտնել է Գիզայի ավազի տակ անսպասելի հայտնագործության մասին, գրել է New York Post-ը։
Գեոռադարների և արբանյակային սքանավորման համաձայն՝ ավազի տակ թաքնված է մեծ անոմալիա, որը, հնարավոր է, վկայում է երկրորդ Սֆինքսի մասին։ Կասկածելի կառույցը մոտ 33 մետր երկարություն ունի, իսկ նրա դիրքը կարող է հայելային լինել հայտնի Մեծ Սֆինքսի և բուրգերի հանդեպ։
Բյոնդին կարծում է, որ այն բանի հավանականությունը, որ սա իսկապես հին արձան կամ մեգակառուցվածք է, մոտավորապես 80 տոկոս է։ Նա նաև ուշադրություն է դարձնում հին քարե արձանագրությունների սիմվոլիկային, ինչպիսին է Քնած սյունը, որը գտնվում է Մեծ Սֆինքսի թաթերի միջև և պատկերում է երկու սֆինքս, ինչը կարող է անուղղակիորեն ակնարկ լինել նմանակ սֆինքսի գոյության մասին։
Սքանավորումները բացահայտել են ուղղահայաց անցքեր և հորիզոնական անցումներ, որոնք, ըստ հետազոտողի, կարող են վկայել հայտնի հնագիտական համալիրի տակ բարդ ստորգետնյա համակարգի մասին։
Միևնույն ժամանակ, շատ հնագետներ կասկածանքով են մոտենում այս պնդումներին: Գիզայի սարահարթը վերջին տասնամյակների ընթացքում լայնորեն ուսումնասիրվել է, և ներկայում երկրորդ արձանի գոյության ուղղակի ապացույցներ չկան: Մինչ այժմ ստացված բոլոր տվյալները հիմնված են երկրաֆիզիկական մեթոդների՝ արբանյակային և գետոռադարային սքանավորման վրա, որոնք թույլ են տալիս տեսնել այն, ինչ մակերեսի տակ է, բայց ուղղակի ապացույցներ չեն տրամադրում։
Մեծ Սֆինքսը մնում է Հին Եգիպտոսի ամենաառեղծվածային հուշարձաններից մեկը, նրա տարիքն ու գործառույթները դեռևս քննարկվում են գիտնականների կողմից: Ժամանակակից տեխնոլոգիաների կիրառմամբ յուրաքանչյուր նոր հետազոտություն ենթադրություններ է առաջացնում ավազի տակ գտնվող թաքնված խցերի, թունելների և այլ կառույցների մասին։
Այս պահին սա վարկած է, ոչ թե փաստ: Երկրորդ Սֆինքսի գոյությունը հաստատելու կամ հերքելու համար անհրաժեշտ են ուղիղ հնագիտական ապացույցներ՝ պեղումներ և կառուցվածքի վերլուծություն:
