Եվրոպական երկրները սկսել են համակարգել հնարավոր քայլերն այն դեպքում, եթե ԱՄՆ նախագահ Դոնալդ Թրամփի վարչակազմը քայլեր ձեռնարկի Գրենլանդիան ձեռք բերելու ուղղությամբ, ներառյալ տնտեսական և քաղաքական ազդեցության միջոցները, հաղորդում է Fox News-ը:
Ֆրանսիայի ԱԳ նախարար Ժան-Նոել Բարրոն հայտարարել է, որ այդ հարցը կքննարկեն Գերմանիայի և Լեհաստանի գործընկերների հետ՝ ընդգծելով համաձայնեցված եվրոպական դիրքորոշման անհրաժեշտությունը: Բեռլինում հաստատել են, որ Գերմանիան հնարավոր պատասխանի շուրջ սերտորեն համագործակցում է Դանիայի և ԵՄ այլ երկրների հետ:
Այս ֆոնին Սպիտակ տունը քննարկում է Գրենլանդիայի բնակիչներին մեկ անձի համար 10-100 հազար դոլար ուղղակի վճարումների տարբերակը՝ նպատակ ունենալով կղզու ներկայացուցիչներին համոզել Դանիայի կազմից դուրս գալ և ԱՄՆ-ի հետ մերձենալ, հայտնում է Reuters-ը՝ հղում անելով իր աղբյուրներին։
Գերատեսչության տվյալներով՝ Թրամփի վարչակազմում չեն բացառում նաև այլ սցենարներ, այդ թվում՝ դիվանագիտական ու ռազմական, Գրենլանդիան դիտարկելով որպես ազգային անվտանգության առաջնահերթություն:
Եվրոպական և Հյուսիսային առաջնորդները, ներառյալ Դանիայի ներկայացուցիչները, հայտարարել են, որ կղզու ապագայի վերաբերյալ ցանկացած որոշում կարող է կայացվել բացառապես Կոպենհագենի և հենց գրենլանդացիների կողմից: Գրենլանդիայի վարչապետ Յենս-Ֆրեդերիկ Նիլսենն ընդգծել էր, որ «տարածքը չի վաճառվում», իսկ անեքսիայի մասին խոսակցություններն անթույլատրելի է համարել:
Սպիտակ տունը հայտարարել էր, որ Թրամփը Գրենլանդիայի ձեռքբերումը դիտարկում է որպես ԱՄՆ ազգային անվտանգության առաջնահերթություն և չի բացառում ռազմական տարբերակները:
Armenia Today
