Աֆղանստանում գիշերը տեղի ունեցած երկրաշարժի հետևանքով մեկ ընտանիքի ութ անդամ է զոհվել Քաբուլի նահանգում։ Հայտնում է Agence France-Presse-ը՝ հղում անելով երկրի առողջապահության նախարարության տվյալներին։
ԱՄՆ Երկրաբանական ծառայության (USGS) տվյալներով՝ 5,8 բալ ուժգնությամբ երկրաշարժը տեղի է ունեցել ուրբաթ օրը՝ տեղական ժամանակով 20:42-ին (Գրինվիչի ժամանակով 16:12-ին)։ Էպիկենտրոնը գտնվել է հյուսիսարևելյան Բադախշան նահանգում՝ 186 կիլոմետր խորության վրա։
AFP-ի փոխանցմամբ՝ ստորգետնյա ցնցումները զգացվել են երկրի բազմաթիվ բնակավայրերում, այդ թվում՝ մայրաքաղաք Քաբուլում։
«Քաբուլի նահանգի Գոսֆանդ-Դարա շրջանում տեղի ունեցած երկրաշարժի հետևանքով մեկ ընտանիքի ութ անդամ է զոհվել», – հայտնել է առողջապահության նախարարության ներկայացուցիչ Շարաֆատ Զամանը:
Նա հավելել է, որ ընտանիքի միակ ողջ մնացած անդամը մոտ երկու տարեկան երեխա է։ Երկրի աղետների դեմ պայքարի գործակալությունը հայտնել է, որ տղան վնասվածքներ է ստացել ստորգետնյա ցնցումների ժամանակ։
News.am
