Ադրբեջանում տեղի ունեցած Թյուրքական պետությունների կազմակերպության 12-րդ գագաթնաժողովի շրջանակում ստորագրվել է Գաբալայի հռչակագիրը։ Փաստաթուղթն ընդունվել է կազմակերպության անդամ երկրների ղեկավարների հանդիպումից հետո։
Ադրբեջանի արտգործնախարար Ջեյհուն Բայրամովը հայտարարել է, որ հռչակագիրը վերահաստատում է թյուրքական աշխարհում համերաշխության ամրապնդումը, փոխադարձ վստահության աճը և հավատարմությունը ինքնիշխանության, անկախության և պետականության սկզբունքներին։
Փաստաթուղթն ընդգծում է կազմակերպության դերը որպես տարածաշրջանային խաղաղության և բազմակողմ համագործակցության խթանման կառուցողական հարթակ և նշում է համատեղ գործողությունների կարևորությունը այնպիսի մարտահրավերների դեմ, ինչպիսիք են ապատեղեկատվությունը, կիբերսպառնալիքները և կլիմայի փոփոխությունը։
Բացի դրանից, ըստ Բայրամովի, փաստաթղթում անդրադառնում է նաև այսպես կոչված «Զանգեզուրի միջանցքին»։
«Առաջնորդները նշել են Միջին միջանցքի միջազգային տրանսպորտային երթուղու, այդ թվում՝ Զանգեզուրի միջանցքի ռազմավարական նշանակությունը՝ ընդգծելով, որ այն զգալիորեն կնպաստի թյուրքալեզու պետությունների միջև կապերի ամրապնդմանը, առևտրաշրջանառության ավելացմանը և ներտարածաշրջանային տնտեսական համագործակցության զարգացմանը։ Պետությունների և կառավարությունների ղեկավարները վերահաստատել են նաև Միջին միջանցքի անդամ երկրների միջև տարածաշրջանային և միջազգային հարցերի վերաբերյալ ընդհանուր դիրքորոշումների մշակման կարևորությունը»,- հայտարարել է Ադրբեջանի արտգործնախարարը։
News.am
