«Քաղաքացիական պայմանագիր» կուսակցության վարչությունում քննարկվել է ՀՀ կրթության, գիտության, մշակույթի և սպորտի նախարար Ժաննա Անդրեասյանի հնարավոր հրաժարականի հարցը։ Տեղեկությունը հայտնում է «Ժողովուրդ» օրաթերթը:
«Մեր աղբյուրների փոխանցմամբ՝ վարչության անդամները փորձել են հասկանալ վարչապետ Նիկոլ Փաշինյանի դիրքորոշումը նախարարի հեռացման վերաբերյալ, սակայն նա, ինչպես սովորաբար, հստակ պատասխան չի տվել: ԱԺ «Քաղաքացիական պայմանագիր» խմբակցության պատգամավոր, ԿԳՄՍ հարցերով մշտական հանձնաժողովի նախագահ Սիսակ Գաբրիելյանն էլ իր մտերիմ շրջապատում հայտնել է, որ առաջիկայում անպայման փոփոխություն է սպասվում, և Անդրեասյանի փոխարեն ինքը կնշանակվի ԿԳՄՍ նախարարի պաշտոնում»,- գրում է թերթը:
Պարբերականը զրուցել է Գաբրիելյանի հետ, բայց նա հերքել է լուրը:
Թերթը նշել է, որ իշխանության ներսում դժգոհություն կա այն հանգամանքից, որ Անդրեասյանի ընկերուհին՝ Մանկավարժական համալսարանի նախկին ռեկտոր Սրբուհի Գևորգյանը, ենթարկվել է պատասխանատվության կոռուպցիոն մեխանիզմների մեջ ներգրավված լինելու համար, մինչդեռ Անդրեասյանը կարողացել է խուսափել որևէ իրավական հետևանքից՝ չնայած նրան, որ համալսարանում կատարվող բոլոր իրադարձություններից քաջատեղյակ է:
Sputnik Արմենիա
