Հաշվի առնելով այն, որ իշխող քաղաքական թիմի և վարչապետի դիքերը բավականին թուլացել են, չի բացառվում, որ 2022 թ. շատ ավելի շուտ ընտրական գործընթաց տեղի ունենա: Այս մասին Tert.am–ի հետ զրույցում ասաց քաղտեխնոլոգ Արմեն Բադալյանը՝ հավելելով, որ այդ սցենարը չի բացառվում՝ ելնելով իշխանությունների վարած ներքին և արտաքին քաղաքականությունից:
ԻՇԽԱՆՈՒԹՅՈՒՆՆԵՐԻՑ ԱՅԼևՍ ՍՊԱՍՈՒՄՆԵՐ ՉԿԱՆ, ԱԺ ԸՆՏՐՈՒԹՅՈՒՆՆԵՐԸ ԿԱՐՈՂ ԵՆ 2022 Թ. ՇԱՏ ԱՎԵԼԻ ՇՈՒՏ ԼԻՆԵԼ. ՔԱՂՏԵԽՆՈԼՈԳ
«Ես չեմ կարծում, որ ՌԴ–ն կհանդուրժի անկանխատեսելի իշխանությունների երկար գոյատևումը, ինչպես նաև երկրի ներսում էլ որևէ հարց չի լուծվում, և իշխանությունների նկատմամբ հիասթափությունը վերաճում է դժգոհությունների: Բացի այդ, «Իմ քայլը» դաշինքի ներսում ևս որոշակի գործընթացներ են տեղի ունենում: Թե երբ կարող են արտահերթ ընտրություններ տեղի ունենալ, այս պահի դրությամբ դժվար է կանխատեսել: Եվ խնդիրը միայն Ամուլսարի հետ կապված չէ. տեսնում ենք՝ չկան այն սպասումները, որ կային 2018 թ. ապրիլ, մայիս, հունիս ամիսներին, հիմա սպասում չկա, որ տնտեսական աճ կունենանք և սոցիալ–տնտեսական վիճակը կբարելավվի: Տեսնում ենք՝ գնաճը բացասական է, աշխատատեղեր են փակվել, և նորերը չեն բացվել: Օրինակ՝ Երևանի օրինակով տեսնում ենք, որ ինչ խնդիրներ կային նախկին իշխանությունների ժամանակ, հիմա էլ կան, ավելին՝ աղբահանության խնդիրը չեն կարողանում լուծել»,-ընդգծեց նա:
Արմեն Բադալյանն ընդգծեց, որ չնայած նրան, որ իշխանությունները ընդգծված պուտինամետ արտաքին քաղաքականություն են փորձում վարել, ՌԴ–ի համար վստահելի չեն:
«Չնայած նրան, որ ասում են՝ ՌԴ–ի հետ փայլուն հարաբերությունների գործընթաց է իրականացվում, մենք տեսնում ենք, որ լուրջ խնդիրներ կան: ՌԴ–ի մոտ միշտ կա կասկած, որ ՀՀ իշխանությունները ցանկացած պահի, ելնելով վարչապետի ցանկությունից, կարող են ինչ–որ այլ երկրների հետ ռևերենսներ անել: Դա կարող է ՌԴ–ին մղել աջակցել ՀՀ–ի որոշ ուժերի երկրում իշխանափոխության գործընթաց իրականացնել»,-նշեց նա:
Արմեն Բադալյանի խոսքով՝ իշխանությունները առհասարակ տապալել են արտաքին քաղաքականությունը, հզորագույն երկրների հետ խնդիրներ կան՝ լինի ԱՄՆ–ն, ՌԴ–ն, Եվրամիությունը, թեկուզ Չինաստանը: Նրա խոսքով՝ չկա հայեցակարգ Հայաստան–Իրան, Հայաստան–Չինաստան հարաբերություներում, ՀՀ–ԱՊՀ երկրների հարաբերություններում և այլն, ընդամենն օրվա հարց է լուծվում: Արմեն Բադալյանը նշեց, որ խոսքը վերաբերում է նաև ներքին խնդիրների լուծմանը: