Իրանի փոխարտգործնախարար Մաջիդ Թախտ-Ռավանչին մեկնաբանել է Նախիջևանում անօդաչու թռչող սարքի միջադեպը և հայտարարել , որ Թեհրանը կապի մեջ է Ադրբեջանի հետ և արդեն պարզաբանել է, որ որևէ պատասխանատվություն չի կրում կատարվածի համար։
«Իրանական կողմը սերտ կապի մեջ է ադրբեջանցի գործընկերների հետ և նրանց բացատրել է, որ որևէ պատասխանատվություն չի կրում հարձակման համար։ Մենք հետաքննում ենք միջադեպը և մեր արդյունքների մասին կտեղեկացնենք մեր ադրբեջանցի ընկերներին»,– France24-ի եթերում ասել է Մաջիդ Թախտ-Ռավանչին։
Ավելի վաղ Ադրբեջանի արտաքին գործերի նախարարությունը հայտնել էր, որ Իրանի տարածքից Նախիջևանի Ինքնավար Հանրապետության վրա անօդաչու թռչող սարքերի հարձակումներ են իրականացվել, որի հետևանքով վիրավորվել է չորս մարդ։ Ադրբեջանի նախագահ Իլհամ Ալիևը հայտարարել էր, որ հանրապետության զինված ուժերին հանձնարարվել է «պատասխան միջոցներ ձեռնարկել Իրանի դեմ»։ Իրանի փոխարտգործնախարար Քազեմ Ղարիբաբադին, իր հերթին, հերքել էր Նախիջևանում կատարվածի վերաբերյալ Թեհրանի մասնակցությունը։
Sputnik Արմենիա
