Թեհրանի դատախազ Ալի Սալեհին հայտարարել է, որ անկարգությունների մասնակիցներին, որոնք վնաս կպատճառեն հանրային և պետական գույքին, ինչպես նաև բախումներ կունենան իրավակարգի և անվտանգության ուժերի հետ, մահապատիժ է սպառնում:
«Դատական համակարգի համար կարմիր գիծ է երկրի քաղաքացիների անվտանգությունը։ Ահաբեկիչների հանդեպ մեր մոտեցումը զսպող կլինի, իսկ նրանց նկատմամբ կընդունվի պետության դեմ պատերազմի մեջ մտնելու համար դատավճիռ» (իրանական օրենսդրությամբ դրա համար սահմանվում է մահապատիժ – խմբ.), – նրա խոսքը մեջբերում է իրանական IRIB պետական հեռուստառադիոընկերությունը։
Հեռուստաընկերության տվյալներով՝ անկարգությունների հետևանքով զոհվել է 6 մարդ, զգալի վնաս է հասցվել մասնավոր և պետական սեփականությանը:
Նախօրեին Իրանում տեղի են ունեցել ամենածավալուն բողոքի ցույցերը, որոնք հրահրվել են 1979 թվականին գահընկեց արված իրանական վերջին շահի որդի Ռեզա Փեհլեվիի կոչով: Սոցիալական ցանցերում տեղադրված տեսանյութերը վկայում էին ծավալուն և զանգվածային ակցիաների մասին։ Այդ ժամանակ էլ երկրում դադարել է աշխատել ինտերնետը։
Հիշեցնենք` Իրանում բողոքի զանգվածային ակցիաներ են անցկացվում դեկտեմբերի 28-ից։ Դժգոհության հիմնական պատճառները փոխարժեքի տատանումներն են ու գների բարձրացումը։ Սակայն ավելի ուշ Իրանի մի շարք քաղաքներում բողոքի ակցիաները վերաճել են ոստիկանության հետ բախումների, իսկ կարգախոսները ստացել քաղաքական բնույթ՝ ընդդեմ Իրանում առկա կարգերի:
Իսլամական Հանրապետությունում անկարգություններ կազմակերպելու մեջ Իրանի Ազգային անվտանգության բարձրագույն խորհուրդը մեղադրել է ԱՄՆ-ին և Իսրայելին:
Sputnik Արմենիա
