Գիտնականներն առաջին անգամ թվային եղանակով կարողացել են հանել մահվան դիմակները Կոլումբիայում հայտնաբերված չորս մումիաներից և վերակերտել նրանց դեմքերը՝ այնպես, ինչպես նրանք կարող էին երևալ կենդանության օրոք, գրում է The Independent-ը։
Այս մումիաները, որոնք պատկանում են Անդերի նախակոլումբիական մշակույթներին՝ 1216-ից 1797 թվականներին, ներառում են մեկ երեխա, մոտ 60 տարեկան կին և երկու երիտասարդ տղամարդ։
Մոմից, կավից, խեժերից և եգիպտացորենից պատրաստված ծիսական դիմակները (երբեմն զարդարված ոսկով և դեկորատիվ տարրերով) խնամքով դրվել են այնպես, որ դրանց տակ գտնվող մարդը «կենդանի» թվա։
Դիմակի տակ գտնվող դեմքը տեսնելու համար մասնագետներն անցկացրել են ԿՏ-սկանավորում, ստեղծել գանգերի եռաչափ մոդելներ, այնուհետև մասնագիտացված ծրագրային ապահովման միջոցով կիրառել մկանները, հյուսվածքները և ճարպը (համեմատելով կոլումբիացիների մոտ փափուկ հյուսվածքների հաստության մասին ժամանակակից տվյալների հետ)։ Քիթը ձևավորվել է ելնելով ոսկրերի կառուցվածքից, իսկ մաշկի, աչքերի և մազերի երանգներն ընտրվել են՝ հաշվի առնելով տարածաշրջանային առանձնահատկությունները։
Ընդ որում, հետազոտողները շեշտում են, որ այս պատկերները ճշգրիտ դիմանկարներ չեն, այլ գիտականորեն հիմնավորված ենթադրություններ. շատ բան (միմիկա, բնածին բծեր, մաշկի անհատական առանձնահատկություններ) մնում է անհայտ։ Սակայն նույնիսկ այսպես, վիզուալիզացիաները արժեքավոր պատկերացում են տալիս նախակոլումբիական ժամանակներում ապրած մարդկանց մշակութային պրակտիկաների և արտաքին տեսքի մասին՝ օգնելով վերականգնել նրանց ինքնության պատմության կողմից կորցրած մասերը։
