Հարավային Կովկասում աշխարհաքաղաքական խաղում խաղադրույքները բարձրանում են
Քաղաքագետ Բենիամին Մաթևոսյանն Alpha News-ի եթերում «Վերնագիր» հեղինակային հաղորդման ընթացքում ներկայացրել է թեմայի շուրջ մասնագիտական վերլուծություն, որում մասնավորապես ասվում է.
««Փաշինյանն այլ ելք չունի, քան վճարի Ադրբեջանին»։ Նմանատիպ հայտարարություններ են հնչում Ադրբեջանից, հնչում են Վաշինգտոնում «խաղաղության պայմանագրի» նախաստորագրումից հետո։ Դրանք հնչում են Ադրբեջանի Միլի Մեջլիսի պատգամավորի, «Արևմտյան Ադրբեջանի համայնք» վարչության նախագահ Ազիզ Ալեքբերլիի շուրթերից։
Ավելին, Ալեքբերլին հայտարարել է, որ արդեն կա 500 հազար «ադրբեջանցի փախստական», որոնք պետք է «վերադառնան» Հայաստան։ «Հարց է ծագում. ի՞նչ պետք է անեն Հայաստանն ու հայերը։ Պատասխանը հստակ է. նրանք պետք է անվերապահորեն ընդունեն Ադրբեջանի բոլոր պայմանները, ներողություն խնդրեն ադրբեջանական պետությունից և ադրբեջանցի ժողովրդից, փոխհատուցում վճարեն մարդկանց և նրանց գույքին հասցված վնասի համար և բարձր մակարդակով ապահովեն «փախստականների» խաղաղ «վերադարձը» «Արևմտյան Ադրբեջանում» գտնվող իրենց «հայրենի» գյուղերն ու տները։ Մեր պետությունների և ժողովուրդների միջև խաղաղության կայունությունը կախված է մեր մարդկանց համատեղ բնակությունից, իսկ մեր համատեղ բնակությունը՝ մեր «փախստականների» «հայրենի հողեր» «վերադարձից»»,- հայտարարել է Ադրբեջանի խորհրդարանի պատգամավորը։
Հայաստանի իշխանությունները, նրանց սպասարկող լրատվամիջոցներն ու «փորձագետները» կարող են հայտարարել, որ ինչպես Ալեքբերլին՝ Ադրբեջանում, այնպես էլ մեր երկրում կան մարդիկ, որոնք, օրինակ, ոչ միայն Կարսը հայկական են համարում, այլև ցանկանում են վերադառնալ այնտեղ։ Իսկապես, նման մարդիկ կան, և դա գաղտնիք չէ։ Բայց այդ մարդկանց դիրքորոշումը ինստիտուցիոնալացված չէ ՀԿ-ի կամ պետության աջակցությունը վայելող որևէ այլ իրավաբանական անձի տեսքով։ Կարսը հայկական համարող մարդիկ չունեն իրենց պատգամավորը խորհրդարանում, չունեն իրենց հեռուստաալիքը, նրանք Հայաստանի պետական միջոցներով կոնֆերանսներ չեն անցկացնում Բրյուսելում, ինչը խոսում է այն մասին, որ Կարս վերադառնալու հարցը պետական քաղաքականություն չէ։ «Արևմտյան Ադրբեջանի համայնք»-ի դեպքում իրավիճակը տրամագծորեն հակառակն է. «Համայնքը» վայելում է Ադրբեջանի նախագահի վարչակազմի լիարժեք աջակցությունը։
Ու ամենակարևորն այս իրավիճակում. ՀՀ իշխանությունները օգոստոսի 8-ից հետո, ԱՄՆ-Հայաստան-Ադրբեջան գագաթնաժողովից հետո, բոլոր հնարավոր միջոցներով, այդ թվում՝ ադրբեջանցիներին Հայաստանի Հանրային հեռուստատեսություն ներգրավելով (օրինակ՝ «այլախոհ» Արիֆ Յունուսովի հարցազրույցը Հանրային հեռուստատեսությանը, որը տարածվեց փաշինյանական բազմաթիվ տեղեկատվական ռեսուրսներով), խոսում էին այն մասին, որ իբր «Արևմտյան Ադրբեջանի համայնք»-ը դե ֆակտո լուծարված է։ Մենք տեսնում ենք, որ դա հերթական ստոր սուտն էր։
Այլ կերպ ասած՝ Նիկոլ Փաշինյանը, որը նախօրեին ԱԺ-ում փաստացի հայտարարեց, որ եթե ՔՊ-ն 2026 թվականին չվերընտրվի, մենք պատերազմ կունենանք, իրականում կարող է 500 հազար ադրբեջանցու բնակեցնել Հայաստանում, եթե հաղթի ընտրություններում։ Ու այդ դեպքում պատերազմն իսկապես անխուսափելի կդառնա։
Մտածե՛ք այդ մասին․.․»։
