Երևանում տեղի կունենա «Էթերնիա» (ETERNIA) մասշտաբային կրկեսային շոուի պրեմիերան` նորաբաց «Tashir Arena» համալիրում։ Նախագծի հիմնական հեղինակներից մեկը հանդիսանում է ֆլեյտահար, երգեհոնահար և կոմպոզիտոր Վալերի Տոլստովը։ Alpha News-ին տված հարցազրույցում նա պատմել է բեմադրության երաժշտական մասի վրա տարվող աշխատանքների, ոգեշնչման աղբյուրների և դահլիճի տեխնիկական առանձնահատկությունների մասին:
«Շոուի վրա աշխատանքը տևել է մոտ մեկ տարի։ Դա շատ բարդ խնդիր էր։ Շոուն բազմաշերտ է, ներառում է բազմաթիվ համարներ, հնարքներ, կերպարներ։ Այս ամենը պետք է արտացոլվի երաժշտության մեջ: Երաժշտությունը պարտավոր է ընդգծել յուրաքանչյուր հերոսի հույզերը, սյուժեն, բնավորությունը», — ասել է Վալերի Տոլստովը:
Կոմպոզիտորը խոստովանել է, որ հայկական մշակույթը խոր ազդեցություն է թողել իր վրա։
«Ես ծնվել եմ այստեղ։ Դա նշանակում է, որ ես արդեն յուրացրել եմ հայկական երաժշտական և հոգևոր ավանդույթի մի մասը։ Պատմական իրադարձությունները դրոշմվում են մեր գենետիկ հիշողության մեջ և ձևավորում մեր մտածողությունն ու ստեղծագործականությունը։ Ցանկացած հայ երաժիշտ ոգեշնչվում է մեր դասականներից՝ Խաչատրյանից, Կոմիտասից, Սպենդիարովից։ Իմ խնդիրն էր ներկայացմանը տալ հայկական բնույթ, գտնել հավասարակշռություն ավանդույթի և ժամանակակից միտումների միջև։ Կարծում եմ՝ դա մեզ հաջողվեց»,-նշել է նա։
Վալերի Տոլստովը նաև կարևորել է տեղի արտիստների հետ աշխատանքը: «Մենք բոլորս գալիս ենք մանկությունից։ Մանկության տարիներին երազում էինք մտնել կախարդանքի աշխարհ: Հիմա այդ երազանքներն իրականանում են այստեղ՝ «Tashir Arena»-ում։ Շքեղ սրահ, մուլտիմեդիա, լույս, ձայն: Եվ, իհարկե, կրկեսի անհավանական արտիստները, որոնք անհավանական հնարքներ են անում։ Թվում է, թե ձգողականության օրենքները չեն գործում»,- ընդգծել է Տոլստովը:
