Հայաստանի իշխանությունները մտադիր են մոտ ժամանակներս հեռացնել ռուս սահմանապահներին թուրքական սահմանին գտնվող «Ախուրիկ» սահմանային անցակետից: Այս մասին NEWS.am-ի թղթակցին հայտնել է դիվանագիտական շրջանակների աղբյուրը:
Աղբյուրի փոխանցմամբ՝ Ախուրիկի անցակետը հանձնելու որոշումն արդեն կայացվել է և նույնիսկ դրոշակաձող է տեղադրվել։ Այնուամենայնիվ, ռուս սահմանապահները կմնան անցակետում։ Այժմ գնահատվում է Թուրքիա տանող երկաթգծի վիճակը։
Նշենք, որ ըստ այլ աղբյուրների տվյալների՝ թուրքական կողմն արդեն սկսել է Մարգարայի անցակետի հատվածի շինարարական աշխատանքները։ Այսպիսով, մի կողմից թուրքական կողմի շինարարության մեկնարկը, մյուս կողմից՝ Ախուրիկի ենթադրյալ գործարկումը, վկայում են տեսանելի ապագայում սահմանի բացման վերաբերյալ մտադրությունների լրջության մասին։
Միևնույն ժամանակ, մասնավոր զրույցներում իրավապահները մտահոգություն են հայտնում սահմանախախտումների հնարավոր աճի վերաբերյալ։ Պաշտոնական տվյալներով՝ 2024 թվականին գրանցվել է պետական սահմանի ապօրինի հատման 160 դեպք՝ 2023 թվականի 78 դեպքի դիմաց։ Դեպքերի թիվն աճել է 82-ով կամ 105,1%-ով։ Հիշեցնենք, որ սահմանախախտները սովորաբար «երրորդ աշխարհի» երկրներից են, ինչպիսիք են Աֆղանստանը և Բանգլադեշը, որոնք Հայաստանը դիտարկում են որպես տարանցիկ կետ։ Խնդիրն ավելի է բարդանում այն փաստով, որ Հայաստանը հաճախ ցուցաբերում է ծայրահեղ մարդասիրություն՝ նրանց ազատ արձակելով կամ փախստականի կարգավիճակ տրամադրելով, ինչի արդյունքում հոսքը միայն ավելանում է, ինչը պարզորոշ ցույց են տալիս վերոնշյալ թվերը։
