Հայաստանում տնտեսական ակտիվության ցուցանիշը (ՏԱՑ) 2025 թ. առաջին 10 ամիսներին նախորդ տարվա նույն ժամանակահատվածի համեմատ աճել է 8.1 %–ով: Այս մասին նշված է ՀՀ վիճակագրական կոմիտեի` այսօր հրապարակած հերթական ամփոփագրում:
Նշենք, որ ՏԱՑ–ը ՀՀ–ում առաջին 9 ամիսներին նախորդ տարվա նույն ժամանակահատվածի համեմատ աճել էր 7.6 %–ով:
Կոմիտեի տվյալներով` 2025 թ. 10 ամսում արտահանումը և ներմուծումը կրկին անկում են արձանագրել. արտահանման ծավալը նվազել է 44.7 %–ով` կազմելով 2 տրլ 487.4 մլրդ դրամ, ներմուծումը` 31.2 %–ով` կազմելով 3 տրլ 928 մլրդ դրամ (2025 թ. առաջին 9 ամիսներին արտահանման ծավալը նվազել էր 46.8 %–ով, ներմուծումը` 33,4 %–ով)։
Արդյունաբերական արտադրանքի ծավալը 2025 թ. հունվար–հոկտեմբերին 3 %–ով ցածր ցուցանիշ է արձանագրել՝ կազմելով 2 տրլն 408.95 մլրդ դրամ:
Շինարարության ոլորտը այս տարվա 10 ամիսներին նախորդ տարվա նույն ժամանակահատվածի համեմատ աճել է 20.6 %–ով՝ կազմելով 551.4 մլրդ դրամ։
Առևտրաշրջանառությունը հաշվետու ժամանակահատվածում աճել է 3,2 %–ով՝ հասնելով 5 տրլն 323.9 մլրդ դրամի:
Ծառայությունների ծավալը 2025 թ. առաջին 10 ամիսներին 2024 թ. նույն ժամանակահատվածի համեմատ աճել է 10.8 %–ով՝ կազմելով 3 տրլն 332.4 մլրդ դրամ:
Սպառողական գների ինդեքսը ինչպես հունվար–սեպտեմբերին, այնպես էլ հոկտեմբերին 3.3 %–ով բարձր է եղել։
Դրամի փոխարժեքը ԱՄՆ դոլարի նկատմամբ հունվար–հոկտեմբերին կազմել է 388.06 դրամ։
Ի դեպ, Հայաստանում 12–ամսյա գնաճը 2025 թվականի հոկտեմբերին կազմել է 3,7%։
Sputnik Արմենիա
