Վերջին 5 տարիները մեր պատմության ամենածանր ժամանակահատվածներից են եղել, փոխվել է ոչ միայն մեր պետության սահմանը, այլև տուժել է մեր վստահությունը։ Այս մասին հոկտեմբերի 21-ին «Հայաստան-Սփյուռք համագործակցության հիմնախնդիրները» թեմայով համաժողովի ժամանակ հայտարարել է կրթության հարցերով փորձագետ, «Հայաքվե» նախաձեռնության անդամ Ատոմ Մխիթարյանը։
Նա հիշեցրել է, որ հայերին բռնի ուժով տեղահանել են Արցախից, ինչը դարձել է հայ ժողովրդի ամենախորը ցնցումներից մեկը՝ նոր և աննախադեպ մարտահրավեր ստեղծելով Հայաստանի և Սփյուռքի միջև հարաբերություններում։
Մխիթարյանը նկատել է, որ այսօր Հայաստանը հայտնվել է բարդ աշխարհաքաղաքական իրավիճակում։ Նրա խոսքով, այս և այլ գործոնները չեն կարող չազդել Սփյուռքի հետ հարաբերությունների որակի վրա։
«Սփյուռքի ներուժը գրեթե չի օգտագործվում մեր համազգային նպատակների իրագործման համար, իսկ պետական մակարդակով աշխատանքը համակարգային բնույթ չի կրում։ Այս պայմաններում Սփյուռքը գործում է ինքնուրույն, մասնատված», – հավելել է նա։
Մխիթարյանը կարծում է, որ Սփյուռքը պետք է դառնա ոչ միայն Հայաստանին տրամադրվող օգնության աղբյուր, այլև համազգային ուժ, իսկ Հայաստանը պետք է դառնա համայն աշխարհի հայերի կենտրոնը։
Հայաստանի և Սփյուռքի միջև համակարգային հարաբերությունների ձևավորման համար նա անհրաժեշտ է համարել ազդեցիկ և համակարգային մարմնի ստեղծումը, որը կզբաղվի այդ հարաբերությունների զարգացման բոլոր ուղղություններով։ «Սա պետք է լինի հաջորդ կառավարության առաջին քայլերից մեկը», – ասել է Մխիթարյանը։
Նրա խոսքով, անհրաժեշտ է մտածել հայրենադարձության ծրագրերի իրականացման մասին, հաշվի առնելով հայերի բռնի տեղահանումը Արցախից, աշխարհում և Հայաստանի շուրջ տիրող անորոշ իրավիճակը, ինչպես նաև աշխարհի տարբեր մասերում հայ համայնքների վրա աճող ճնշումը։ «Սա ոչ միայն հումանիտար, այլև ժողովրդագրական, ինչպես նաև տնտեսական հրամայական է», – եզրափակել է Մխիթարյանը։
News.am
