Երևանի մշակութային և ժամանցային նոր կենտրոնի՝ «Տաշիր Արենայի» բացումը կկայանա հոկտեմբերի 24-ին, իսկ առաջին թատերական-կրկեսային շոուն հանդիսատեսի համար կներկայացվի հաջորդ օրը` հոկտեմբերի 25-ին։
«Տաշիր» ընկերությունների խումբը ձեռք էր բերել կրկեսի շենքը, որը վթարային վիճակում էր։ Որոշում էր կայացվել տարբեր ոլորտների միջազգային լավագույն մասնագետների ներգրավմամբ շենքը քանդել և վերակառուցել զրոյից՝ վերազինելով առաջադեմ տեխնոլոգիաներով։
Շենքը նախատեսված է ինչպես կրկեսային ներկայացումների, այնպես էլ սպորտային, համերգային ծրագրերի, կոնֆերանսների և մանկական միջոցառումների համար: Նախագծի իրականացման համար ծախսվել է 55 մլն դոլար։
Դահլիճում կարող է տեղավորվել մինչև 2000 հանդիսատես: Նախատեսված է նաև VIP-պարտեր։ Բեմի տրամագիծը 13 մետր է։ Սա կրկեսի դասական չափն է:
Sputnik Արմենիա
