Ընդհանուր ինֆորմացված եմ, բայց վթարների վերաբերյալ վերջնական վերլուծությունը ընթացքի մեջ է։ Ես կհասկանամ բուն ինչ հիմնական հետևանքների պատճառով են անջատումները եղել։ Այս մասին հունվարի 8-ին NEWS.am-ի թղթակցի հետ զրույցում հայտարարել է Հանրային ծառայությունները կարգավորող հանձնաժողովի (ՀԾԿՀ) նախագահ Մեսրոպ Մեսրոպյանը։
Նա բացատրել է, որ խնդիրը վերաբերում է «Վարդաշենի» ենթակայանին։ Նա նշել է, որ այս դեպքը մանրակրկիտ մասնագիտական հետաքննություն է պահանջում։
Մեսրոպյանը հայտնել է, որ «Տաշիր գրուպ» ընկերության բողոքի վերաբերյալ գործընթացն ընթանում է իր հունով, հարցը գտնվում է դատարանների իրավասության ներքո, ուստի ինքը չցանկացավ որևէ կանխատեսում անել։ Պաշտոնյան հավելել է, որ «Հայաստանի էլեկտրական ցանցեր» ընկերությանը լիցենզիայից զրկելուց հետո՝ երեք ամսվա ընթացքում, ընկերությունը և Կառավարությունը պետք է ավարտեն գնի և սեփականության փոխանցման շուրջ բանակցությունները։ «Եթե չլինի փոխհամաձայնություն կամ նման բանակցային արդյունքները չեն ավարտվի որևէ թվի շուրջ՝ դրան կհաջորդի արդեն սահմանադրական գերակա շահ ճանաչելու ճանապարհով սեփականությունը վերցնելու հարցը», – եզրափակել է Մեսրոպ Մեսրոպյանը։
