Մարտի 26-ին Հայաստանի իշխող «Քաղաքացիական պայմանագիր» խմբակցության նախկին պատգամավոր, ԱԺ պետական-իրավական հարցերի մշտական հանձնաժողովի նախկին նախագահ Վլադիմիր Վարդանյանը երդում է տվել Սահմանադրական դատարանի դատավորի պաշտոնում։
Վարդանյանը Սահմանադրական դատարանի դատավոր է ընտրվել Ազգային ժողովում անցկացված գաղտնի քվեարկության արդյունքներով։ 67 պատգամավոր կողմ է քվեարկել Վլադիմիր Վարդանյանի թեկնածությանը, դեմ՝ 0։ Սահմանադրական դատարանի դատավորի պաշտոնում Վլադիմիր Վարդանյանի թեկնածությունն առաջադրել էր հանրապետության նախագահ Վահագն Խաչատրյանը։
Վարդանյանը 2003-2006 թվականներին աշխատել է որպես Սահմանադրական դատարանի աշխատակազմի իրավախորհրդատվական ծառայության գլխավոր մասնագետ: 2006-2013 թվականներին գլխավորել է ՍԴ միջազգային պայմանագրերի բաժինը, իսկ 2013-2016 թվականներին ղեկավարել է համապատասխան ծառայությունը:
2016-2018 թվականներին նա զբաղեցրել է Սահմանադրական դատարանի խորհրդականի պաշտոնը, իսկ 2019 թվականին գլխավորել է ՍԴ աշխատակազմը: Նույն թվականին Վարդանյանն ընտրվել է խորհրդարանի պատգամավոր «Իմ քայլը» դաշինքից, իսկ 2021-ին՝ «Քաղաքացիական պայմանագիր» կուսակցության ցուցակով։
News.am
