Հայաստանյան օգտատերերի կողմից համացանցում այսօր ժամը 11:10–ից նկատված խնդիրները կրել են տարածաշրջանային բնույթ և պայմանավորված են եղել «Google» ընկերության կողմից մատուցվող ծառայությունների խափանմամբ: Տեղեկությունը հայտնում է ՀՀ բարձր տեխնոլոգիական արդյունաբերության նախարարությունը։
«Հարկ է նշել, որ ըստ «Google»–ի տարածած տեղեկատվության՝ խնդրին բախվել է ավելի քան 50 երկիր»,– մասնավորապես նշված է գերատեսչության հաղորդագրության մեջ:
Նշենք, որ այսօր առավոտից հայաստանյան օգտատերերն ահազանգում էին Google–ում և Youtube–ում համատարած խափանումների մասին։ Մոտ երկու ժամ տևած խափանման պատճառով հնարավոր չէր օգտվել որոնողական համակարգից և մյուս ծառայություններից։
Համացանցում արձանագրված խափանումների պատճառով ընդհատվեց նաև ժամը 11։00–ին սկսված ՀՀ կառավարության նիստը։
Sputnik Արմենիա
