ՀՀ վարչապետ Նիկոլ Փաշինյանի գլխավորած «Քաղաքացիական պայմանագիր» կուսակցությունը (ՔՊԿ) հրապարակել է իր նախընտրական ծրագիրը 2026 թվականի հունիսի 7-ին կայանալիք խորհրդարանական ընտրությունների համար։
Նախաբանում Փաշինյանի ուղերձն է քաղաքացիներին, որում նա հայտարարում է, որ ՔՊ կուսակցությունը կատարել է «ձեր առաջ ստանձնած մեծագույն առաքելությունը»։ «Հայաստանի և Ադրբեջանի միջև խաղաղություն է հաստատվել, և այսպիսով, Հայաստանի համար խաղաղ զարգացման դարաշրջանը բացված է։ Հունիսի 7–ին կայանալիք ընտրություններում Ձեզ հետ միասին մենք մի խնդիր ունենք լուծելու․ պետք է տեր կանգնենք Խաղաղությանը, որը նոր է, մանուկ է, դեռևս խոցելի է և մեր ամենօրյա խնամքի կարիքն ունի», – ասվում է ուղերձի տեքստում։
Նշվում է, որ «Քաղաքացիական պայմանագիր» կուսակցության նախընտրական ծրագրի գաղափարախոսական հենքն Իրական Հայաստանի գաղափարախոսությունն է և Հայաստանի տնտեսական ու ինստիտուցիոնալ վերափոխման դոկտրինը։
Ծրագրում նշվում է, որ Հայաստանի և Ադրբեջանի միջև խաղաղության ինստիտուցիոնալացումը մեկնարկել է դեռևս 2024 թվականին՝ ՀՀ Տավուշի մարզի հատվածում պետական սահմանի սահմանազատման և սահմանագծման գործընթացով, ապա և Հայաստանի ու Ադրբեջանի սահմանազատման հանձնաժողովների համատեղ գործունեության կանոնակարգի ստորագրմամբ և վավերացմամբ, ու շարունակվել է 2025 թ. օգոստոսի 8-ին Հայաստանի Հանրապետության և Ադրբեջանի Հանրապետության միջև խաղաղության ու միջպետական հարաբերությունների հաստատման մասին համաձայնագրի նախաստորագրմամբ և Վաշինգտոնի հռչակագրով խաղաղության ու տրանսպորտային ենթակառուցվածքների ապաշրջափակման սկզբունքների հաստատմամբ։
Նշվում է, որ Խաղաղության հետագա ինստիտուցիոնալացման առաջնային քայլերն են սահմանազատման գործընթացի շարունակությունը, TRIPP նախագծի իրագործումը՝ 2025 թ. օգոստոսի 8–ի Վաշինգտոնի հռչակագրի և 2026 թ. հունվարի 14–ին ՀՀ և ԱՄՆ կառավարությունների կողմից ընդունված TRIPP-ի իրականացման շրջանակի բովանդակությանը համապատասխան, որը կհանգեցնի տարածաշրջանային կապուղիների լիարժեք ապաշրջափակման, Հայաստանի Հանրապետության և Ադրբեջանի Հանրապետության միջև խաղաղության ու միջպետական հարաբերությունների հաստատման մասին նախաստորագրված համաձայնագրի վերջնական ստորագրումը, վավերացումը, դրանում նախատեսված քայլերի հետագա իրագործումը։
Փաստաթղթում հատուկ շեշտադրում է դրվում կրթության վրա, որը հայտարարված է «ռազմավարությունների ռազմավարություն»։
Ծրագիրը ներառում է նաև հավասարակշռված և հավասարակշռման արտաքին քաղաքականություն, արտաքին և ներքին անվտանգություն, պարենային և էներգետիկ անվտանգություն, արդարադատության և պետական կառավարման բարեփոխումներ, քրեական ենթամշակույթի դեմ պայքար, թվայնացում, արհեստական բանականություն, կիբեռանվտանգություն, սոցիալական համերաշխություն, տնտեսական զարգացում, գիտություն, մշակույթ, սպորտ, զբոսաշրջություն, գյուղատնտեսություն, ջրային ռեսուրսներ, շրջակա միջավայր, բնակարանային քաղաքականություն և սփյուռքի հետ հարաբերություններ։
Փաստաթղթում նշվում է, որ Վրաստանի, Իրանի, Թուրքիայի և Ադրբեջանի հետ հարաբերությունների հետագա զարգացումը մեծ նշանակություն ունի։ Փաստաթղթում նաև նշվում է, որ Ռուսաստանի Դաշնության հետ հարաբերությունները գտնվում են կառուցողական տրանսֆորմացիայի փուլում․ Հայաստանը զարգացնելու է փոխշահավետ կառուցողական հարաբերություններ Ռուսաստանի Դաշնության հետ։
Ծրագրի համաձայն՝ Հայաստանի Հանրապետությունը կշարունակի իրականացնել Եվրամիության անդամակցության չափանիշներին համապատասխանելու համար անհրաժեշտ բարեփոխումները, մինչև այդ չափանիշներին լիովին համապատասխանի։ Նաև նշվում է, որ քանի դեռ ԵՄ-ի հետ մերձեցումը և ԵՄ անդամակցության չափանիշներին համապատասխանելուն ուղղված բարեփոխումները համատեղելի են ԵԱՏՄ-ին անդամակցության հետ, Հայաստանը կմնա ԵԱՏՄ անդամ և կզարգացնի առևտրատնտեսական հարաբերություններ միության անդամ պետությունների հետ։
Առանձին բաժին է հատկացված Հայաստանյայց Առաքելական Սուրբ Եկեղեցու բարենորոգմանը։ Ծրագիրը նախատեսում է Հայաստանյայց Առաքելական Սուրբ Եկեղեցու փաստացի պետի հեռացում, Կաթողիկոսական տեղապահի ընտրություն, Հայաստանյայց Առաքելական Սուրբ Եկեղեցու Կանոնադրության ընդունում և Ամենայն Հայոց Կաթողիկոսի ընտրություն։
Փաստաթղթում նաև խոսվում է ժողովրդի կամքի ազատ արտահայտման միջոցով նոր Սահմանադրության ընդունման մասին, որը, նշվում է, պետք է իրավական կարգին տա լիարժեք լեգիտիմություն և հնարավորություն տա արդարադատության և արդարության ինստիտուցիոնալացման։
Փաստաթուղթը եզրափակվում է 100 կոնկրետ քայլերի ցանկով, որոնք «Քաղաքացիական պայմանագիր» կուսակցությունը մտադիր է իրականացնել 2026-2031 թվականներին։ Դրանց թվում են ՀՆԱ-ի տարեկան միջին աճը առնվազն 6%-ով, արդյունաբերական արտադրության 50%-ով աճը, տարեկան առնվազն 25,000 նոր աշխատատեղերի ստեղծումը, աղքատության կրճատումը 5 տոկոսային կետով, Ղարաբաղից տեղահանված 10,000 ընտանիքների համար բնակարանով ապահովումը, Կիբեռպաշտպանության ազգային կենտրոնի ստեղծումը, մեր սեփական տիեզերական արբանյակների ձեռքբերում և շահագործումը, կենսաչափական անձնագրերի համակարգի ներդրումը, ԵՄ-ի հետ ազատ վիզային ռեժիմի հաստատումը և սփյուռքի հետ հարաբերությունների վերաֆորմատավորում։
Նովոստի-Արմենիա
