Ինդոնեզիայում անցկացվող մարմնամարզության մեծահասակների աշխարհի առաջնությունում Մամիկոն Խաչատրյանը դարձել է արծաթե մեդալակիր։
Տեղեկությունը հայտնում են Հայաստանի մարմնամարզության ֆեդերացիայից։
Հայ մարզիկը նժույգ թափեր վարժությունում հավաքել է 14 600 միավոր։ Ընդ որում՝ աշխարհի չեմպիոնի տիտղոսը նվաճած Չինաստանի ներկայացուցիչ Յանմին Յոնը վաստակել է նույնքան միավոր:
Այս վարժությունում Հայաստանի մյուս ներկայացուցիչ, Եվրոպայի չեմպիոն, երիտասարդների աշխարհի կրկնակի չեմպիոն Համլետ Մանուկյանը զբաղեցրել է 4-րդ տեղը՝ վաստակելով 14.433 միավոր:
Համլետ Մանուկյանն ու Մամիկոն Խաչատրյանն առաջին անգամ էին մասնակցում մեծահասակների աշխարհի առաջնությանը:
Ջակարտայում անցկացվող սպորտային մարմնամարզության աշխարհի առաջնությունում եզրափակիչ է դուրս եկել նաև Օլիմպիական փոխչեմպիոն, աշխարհի չեմպիոն, Եվրոպայի եռակի չեմպիոն Արթուր Դավթյանը: Նա հենացատկի վարժության որակավորման փուլում վաստակել է 14.566 միավոր և երկրորդ տեղով դուրս եկել եզրափակիչ: Հենացատկի վարժության եզրափակիչը տեղի կունենա հոկտեմբերի 25-ին:
Sputnik Արմենիա
