Մայր աթոռ սուրբ Էջմիածինը դատապարտել է Միքայել սրբազանի և բարերար Սամվել Կարապետյանին կալանքի տակ պահելը երկարացնելու որոշումները։
«Գերաշնորհ Միքայել արքեպիսկոպոս Աջապահյանին և ազգային բարերար Սամվել Կարապետյանին կալանքի տակ պահելը երկարացնելու որոշումներով դատարանը հերթական անգամ ոտնահարեց արդարադատությունը՝ կրկին պարզորոշ դարձնելով իշխող քաղաքական ուժից դատարանների լիակատար կախվածությունը: Նման անհիմն որոշումներով արդարադատությունը ձեռք է բերում պատժիչ նշանակություն, իսկ դատարանները վեր են ածվում ազատ խոսքի և կրոնի ազատության բռնաճնշման գործիքի»,–նշված է Մայր աթոռ սուրբ Էջմիածնի տարածած հաղորդագրության մեջ:
Ընդգծվում է, որ այսպիսի գործելաոճը բնորոշ է ամբողջատիրական համակարգերին և աղերս չունի իշխանությունների կողմից տարփողվող ժողովրդավարական արժեքների հետ:
Մայր աթոռում վստահ են, որ եկեղեցականների և եկեղեցու աջակիցների նկատմամբ կիրառվող բռնաճնշումները և տեղեկատվական ահաբեկչության միջոցները չեն կարող լռեցնել նրանց և արդարության ձայնը:
«Միքայել արքեպիսկոպոս Աջապահյանի և ազգային բարերար Սամվել Կարապետյանի իրավունքները պետք է անհապաղ վերականգնվեն, բացառվի ապօրինի հետապնդումը, և նրանք պետք է անհապաղ ազատ արձակվեն կալանքից»,–նշված է հայտարարության մեջ։
Ավելի վաղ հայտնել էինք, որ դատարանը մերժեց Շիրակի թեմի առաջնորդ Միքայել արքեպիսկոպոս Աջապահյանին կալանքից ազատելու միջնորդությունը։ Դատավոր Արմինե Մելիքսեթյանը հայտարարեց, որ պաշտպանական կողմի բերած հիմնավորումները համոզիչ չէին, այդ հիմքով կալանքից ազատման միջնորդությունը ենթակա է մերժման։
Նա Աջապահյանի կալանքի ժամկետը երկարաձգեց 10 օրով` պահպանելով սահմանափակումները։
Օգոստոսի 15–ին էլ ավելի քան 12 ժամ տևած դատական լսումներից հետո ՀՀ հակակոռուպցիոն դատարանի դատավոր Տիգրան Դավթյանը 2 ամսով երկարացրեց Սամվել Կարապետյանի կալանքի ժամկետը։
Sputnik Արմենիա
