Սաուդյան Արաբիան, Կատարը և Օմանը ջանքեր են գործադրել համոզելու ԱՄՆ նախագահ Դոնալդ Թրամփին չհարձակվել Իրանի վրա, հայտնում է AFP-ն՝ հղում անելով անանուն արաբ պաշտոնյայի:
Ըստ աղբյուրի՝ երեք երկրներն զգուշացրել են ԱՄՆ-ին Իրանի դեմ գործողություններ ձեռնարկելու դեպքում «լուրջ տարածաշրջանային հետևանքների» մտահոգությունների մասին:
«Ինտերֆաքս»-ը, հղում անելով Financial Times-ին (FT), հաղորդել է, որ Սաուդյան Արաբիայի, Թուրքիայի, Կատարի, Օմանի և Եգիպտոսի կողմից Թրամփին Իրանին հարվածելուց հրաժարվելու դիվանագիտական ջանքերն «օգնել են նվազեցնել լարվածությունը Պարսից ծոցում»: FT-ի աղբյուրը հավելել է, որ ԱՄՆ-ն Իրանի հետ բանակցություններին ժամանակ է տվել՝ «տեսնելու, թե որտեղ է սա տանում»:
Միևնույն ժամանակ, անանուն դիվանագետը հրատարակությանը հայտնել է, որ USS Abraham Lincoln-ի գլխավորած ամերիկյան հարվածային խումբը Հնդկական օվկիանոսից շարժվում է դեպի Մերձավոր Արևելք: FT-ի մեկ այլ աղբյուրի համաձայն՝ ԱՄՆ ռազմական հարվածի հարցը «մնում է սեղանին, և Թրամփը պատրաստ է սեղմել ձգանը»:
The New York Times (NYT)-ը, հղում անելով ամերիկացի պաշտոնյայի, գրում է, որ Իսրայելի վարչապետ Բենիամին Նեթանյահուն ևս խնդրել է ԱՄՆ նախագահին հետաձգել Իրանի վրա հարվածը։ Նշվում է, որ նրանց զրույցը տեղի է ունեցել հունվարի 14-ին։ Նույն օրը Թրամփը հայտարարել էր, որ «շատ կարևոր աղբյուրներից» տեղեկատվություն է ստացել, որ Իրանում այլևս չեն սպանվում ցուցարարներ, և որ մահապատիժները դադարեցվել են։ NYT-ի տվյալներով՝ սա ապացույց է, որ ԱՄՆ նախագահը հրաժարվել է Իրանի վրա հարձակվելու գաղափարից։
Թրամփն ավելի վաղ հայտարարել էր, որ ցուցարարների և իշխանությունների միջև բախումների ժամանակ Իրանում սպանություններն ու բռնությունը դադարել են՝ չնայած Իրանի դեմ կոշտ միջոցների կիրառման հնարավորության բազմիցս բարձրաձայնմանը: Իրանում բողոքի ցույցերը շարունակվում են դեկտեմբերի 28-ից:
Armenia Today
