Երևանի ընդհանուր իրավասության առաջին ատյանի դատարանի Ավան նստավայրում այսօր ավարտվեց Շիրակի թեմի առաջնորդ Միքայել արքեպիսկոպոս Աջապահյանի գործով նիստը։ Այն պետք է վերջինը լիներ, որից հետո դատավոր Արմինե Մելիքսեթյանը պետք է դատավճիռը հրապարակեր, սակայն պաշտպանական կողմի խնդրանքով նիստը հետաձգվեց։
«Ես ունեմ ռեպլիկի իրավունք, որից օգտվելու եմ, թեև 10 րոպե է լինելու։ Միքայել սրբազանն ունի վերջին խոսքի և ռեպլիկի իրավունք, որից օգտվելու է։ Քանի որ աշխատանքային ժամն ավարտվել է, թողնենք հաջորդ նիստին», – ասաց պաշտպան Արա Զոհրաբյանը։
Սրբազանի մեկ այլ պաշպան Երեմ Սարգսյանը դատարանին ներկայացրեց եզրափակիչ խոսքն ու Միքայել արքեպիսկոպոս Աջապահյանի համար արդարացում պահանջեց՝ հայտարարելով, որ մեղադրող կողմը չի կարողացել ապացուցել մեղադրանքը, այսինքն՝ հեղաշրջման կոչ իր պաշտպանյալի կողմից չի եղել։
Հաջորդ դատական նիստը կկայանա վաղը՝ սեպտեմբերի 23-ին՝ ժամը 15:30-ին։
Նշենք, որ Միքայել Արքեպիսկոպոս Աջապահյանի նկատմամբ քրեական գործ է հարուցվել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։
Sputnik Արմենիա
