ՆԱՏՕ-ն ողջունում է կարգավորման գործընթացի վերջին քայլերը և աջակցում է հարաբերությունների կարգավորման և մշտական խաղաղության համաձայնագրի հասնելու ուղղությամբ Ադրբեջանի և Հայաստանի ձեռնարկած բոլոր կառուցողական գործողություններին: Դրա մասին APA գործակալությանը հայտարարել է Հարավային Կովկասում ՆԱՏՕ-ի գրասենյակի ղեկավար Ալեքսանդր Վիննիկովը:
Ըստ նրա՝ դա կարևոր է Սևծովյան տարածաշրջանի կայունության համար. «Մենք այդ գործընթացի անմիջական մասնակից չենք, սակայն միշտ բարձր ենք գնահատել և աջակցել մեր դաշնակիցների ջանքերին՝ հակամարտությունների կարգավորումը խթանելու համար: Օգոստոսի 8-ին Վաշինգտոնում խաղաղության համաձայնագրի նախաստորագրումը կարևոր ենք համարում քայլ դեպի կայուն խաղաղություն և բաց կապեր տարածաշրջանում: Դա, իր հերթին, կամրապնդի տարածաշրջանային կայունությունն ու անվտանգությունը, ինչպես նաև կամրապնդի տարածաշրջանի պետությունների հետ ՆԱՏՕ-ի գործընկերությունը»:
Ալեքսանդր Վիննիկովը նշել է նաև, որ Ադրբեջանը հավատարիմ գործընկեր է և համագործակցում է ՆԱՏՕ-ի դաշնակիցների և այլ գործընկեր երկրների հետ բազմաթիվ, դրանց թվում՝ անվտանգության և պաշտպանության բարեփոխումների, կիբերպաշտպանության և ահաբեկչության դեմ պայքարի ոլորտներում:
«Ադրբեջանի զինված ուժերի կարողությունների և Դաշինքի հետ դրանց փոխգործունակության բարձրացումը ՆԱՏՕ-ի և Ադրբեջանի միջև գործընկերության հիմնական ոլորտներից մեկն է։ 1994 թվականից ի վեր ՆԱՏՕ-ի «Գործընկերություն հանուն խաղաղության» ծրագրին Ադրբեջանի մասնակցությունը ՆԱՏՕ-ին և առանձին դաշնակիցներին հնարավորություն է տվել աջակցել Ադրբեջանին ընտրված ստորաբաժանումների մշակման գործում՝ փոխգործունակությունը բարձրացնելու համար։ Ծրագրի շրջանակում Ադրբեջանը մշակում է ՆԱՏՕ-ի չափանիշներին համապատասխանող ստորաբաժանումներ, պատրաստում է ուժեր ՆԱՏՕ-ի գլխավորած խաղաղապահ գործողություններին մասնակցելու համար և զարգացնում է այլ կարողություններ այն պոտենցիալ առաքելությունների համար, որոնցում Ադրբեջանը կարող է մասնակցել ապագայում»,- նշել է նա։
Այսպիսով, ՆԱՏՕ-ն լիովին անտեսում է ինչպես Հայաստանի դեմ ադրբեջանական ագրեսիայի բազմաթիվ դեպքերը, այնպես էլ բռնազավթված Լեռնային Ղարաբաղից հայ բնակչության տեղահանությունը։
News.am
