Հայաստանում իշխանության և ընդդիմության ներկայիս մոդելը չի կարող հանգեցնել փոփոխությունների. երկիրը նոր ուժի կարիք ունի, հայտարարել է «Մեր ձևով» շարժման համակարգող Նարեկ Կարապետյանը՝ մեկնաբանելով Վաղարշապատի ընտրությունների արդյունքները:
«Մենք պետք է հասկանանք, որ իշխանության և ընդդիմադիրների հին, այսօր եղած պարադիգման չի կարող բերել հաջողություն։ Հայաստանին նոր ուժ է պետք, որպեսզի կարողանանք փոփոխություններ անել», – ասել է նա լրագրողների հետ զրույցում:
Կարապետյանը նաև նշել է, որ Էջմիածնում ընդդիմադիր թեկնածուները միասին ավելի շատ ձայներ են ստացել, քան իշխանության թեկնածուն: Ընդգծելով, որ «պարադիգման պետք է փոխվի», շարժման համակարգողը հայտարարել է, որ «Մեր ձևով»-ը պատրաստ է դառնալ նման նոր ուժ:
«Եղած ստատուս քվոյի, իրավիճակի պարագայում երկրում փոփոխություններ չեն լինելու, իսկ մեր հասարակության մեծ մասը սպասում է փոփոխությունների։ Դրա համար մենք առաջարկել ենք, որ պատրաստ ենք ստանձնել ինչ-որ պատասխանատվություն՝ Հայաստանում փոփոխություններ բերելու առաջամարտիկը լինել», – հայտարարել է Կարապետյանը:
Վաղարշապատի ընտրություններում «Մեր ձևով» շարժման առաջնորդ Սամվել Կարապետյանին հաղթելու մասին իշխանությունների պնդումների վերաբերյալ շարժման համակարգողն ընդգծել է, որ «Մեր ձևով»-ը վերջին համայնքային ընտրություններում թեկնածու չի ունեցել:
Կարապետյանը նաև մեկնաբանել է Ադրբեջանի տարածքով Հայաստան ցորենի մատակարարումը։ Նա նշել է, որ Հայաստանն այլ երկրներից կարող է ներմուծել նավթ, ցորեն, դա լավ դիվերսիֆիկացիա է երկրի համար, սակայն խնդիրն Ադրբեջանի հետ չկարգավորված հարցերն են։
Վաղարշապատում նոյեմբերի 16-ին անցկացվել էին ավագանու և համայնքի ղեկավարի ընտրություններ։ Կենտրոնական ընտրական հանձնաժողովը հրապարակել էր ընտրությունների նախնական արդյունքները, ըստ որի՝ «Քաղաքացիական պայմանագիր» կուսակցությունը (քաղաքապետի թեկնածու՝ Արգիշտի Մեխակյան) հավաքել է 15 298 ձայն։ «Հաղթանակ» դաշինքն ստացել էր 31,9% (10 050 ձայն, համայնապետի թեկնածու՝ Սևակ Խաչատրյան)՝ զիջելով ՔՊ-ին։
Armenia Today
