Մենք ողջունում ենք ցանկացած նախաձեռնություն, որն ուղղված է խաղաղությանը` կլինի Ադրբեջանի, թե մյուս հարևանների հետ։ 44-օրյա պատերազմի հինգերորդ տարելիցի առթիվ «Եռաբլուր» զինվորական պանթեոն կատարած այցի ժամանակ լրագրողների հետ զրույցում ասաց Արցախի նախկին նախագահ Սամվել Շահրամանյանը։ Միևնույն ժամանակ նա հավելեց, որ սա չի նշանակում, թե Արցախի հարցը պետք է անտեսվի։
«Մշտապես նշում ենք, որ արցախցիների հարցը պետք է ստանա համապատասխան լուծում։ Չի կարող այս հարցը լուծված համարվել, եթե արցախցին զրկված է իր հայրենիքից։ Այսօր աչք փակելով այդ հարցի վրա` մեծ խնդիր են ստեղծում հետագայի համար թե՛ Հայաստանը, թե՛ Ադրբեջանը։ Այս հարցը պետք է ստանա լուծում`արժանապատիվ և անվտանագ վերադարձի տեսքով»,– ասաց նա։
Խոսելով 5 տարի առաջ Ադրբեջանի` Արցախի վրա հարձակումից խուսափելու հնարավարության մասին, Շահրամանյանը նշեց, թե չի կարող այսօր պատասխանել` արդյոք նման հնարավորություն կար։
«Տարիներ շարունակ ձևավորված է եղել Մինսկի խումբ, որը զբաղվում էր այդ հակամարտության կարգավորմամբ, և տարիներ շարունակ լսում էինք, որ Արցախի հարցը չունի ռազմական լուծման տարբերակ։ Այսօր, ցավոք սրտի, ականատես ենք, որ աշխարհում ուժի տարբերակով են լուծվում հարցերը»,– նշեց Շահրամանյանը։
Արցախի նախկին նախագահը, անդրադառնալով քննադատություններին, թե արցախցիները պետք է մնային ու մինչև վերջ կռվին, նշեց, որ նման արտահայտություններ անողներին չի կարող լուրջ մարդ համարել։
Sputnik Արմենիա
