Չի կարող երկրում ոչ ժողովրդավարական համակարգ ստեղծած անձնավորությունն իր կուսակցության ներսում ժողովրդավարություն ու ժողովրդավարական համակարգ ստեղծել։ Sputnik Արմենիայի հետ զրույցում ասաց քաղաքագետ, քաղաքական և ընտրական տեխնոլոգիաների փորձագետ Արմեն Բադալյանը՝ մեկնաբանելով «Քաղաքացիական պայմանագիր» կուսակցության ընտրական ցուցակի հաստատման առաջին փուլի քվեարկության արդյունքները։
Ըստ հրապարակված տվյալների՝ ընտրություններին մասնակցել է 1028 կուսակցական, 96 քվե անվավեր է ճանաչվել։ Առաջին հորիզոնականում ՀՀ վարչապետ Նիկոլ Փաշինյանն է։ Նա ստացել է 894 քվե (38 անձ չի ընտրել նրան- խմբ․), երկրորդ տեղում պաշտպանության նախարար Սուրեն Պապիկյանն է (780), 3-րդում՝ էկոնոմիկայի նախարար Գևորգ Պապոյանը (765), 4-րդում` արտգործնախարար Արարատ Միրզոյանը (743), 5-րդում` ՔՊ–ական պատգամավոր Վահագն Ալեքսանյանը (697)։
Քաղաքագետի կարծիքով՝ այն, որ 38 ՔՊ-ական Նիկոլ Փաշինյանի օգտին չի քվեարկել, ոչինչ չի նշանակում, հնարավոր է՝ անձնական, ներկուսակցական խնդիրներ կան, դա հիմք ընդունելով կարծել, թե իրավիճակ կարող է փոխվել, անիրատեսական է։
«Էական չէ, թե քանի հոգի են քվեարկել վարչապետի կամ 2-րդ, 3-րդ, 4-րդ թեկնածուի օգտին։ Դա լիդերային տիպի կուսակցություն է, լիդերն է որոշում, ով և որ տեղում պետք է լինի, և այդպես էլ կազմակերպում է գործընթացը՝ դրան տալով ժողովրդավարության շղարշ, բայց իրականում ինքն է որոշում։ Այդ 1 մարդու առկայությունը կուսակցությանն ուրիշ քաղաքական կշիռ է տալիս, առանց այդ 1 մարդու տվյալ քաղաքական ուժը 0 կշիռ ունի։ Ուստի այդ «ժողովրդավարական գործընթացներին» անդրադառնալը ինքնին իմաստ չունի, լիդերային կուսակցությունում նրանք դերակատարություն չունեն»,- ասաց նա։
Քաղաքագետն ընդգծում է՝ որքան էլ հայտարարեն, թե փրայմերիզ են անում, ժողովրդավարական երկրներում դա այդպես չի արվում։ Դա ենթադրում է գնալ կուսակցական տեղամասեր, տեղում փրայմերիզներ, այսինքն՝ ընտրողների ժողովներ անցկացնել, մասնակցել, միմյանց քննադատել, ակտիվ գործողություններ իրականացնել, ինչպես դա տեղի է ունենում Միացյալ Նահանգներում կամ ժողովրդավարական որևէ երկրում։
«Իսկ նման բան չի եղել, քվեարկությունն ըստ կուսակցության ղեկավարի քմահաճույքի է եղել»,- ասաց Բադալյանը։
Ինչ վերաբերում է այն հանգամանքին, որ ԱԺ նախագահ Ալեն Սիմոնյանն ընտրական ցուցակում 9-րդն է և զիջում է խմբակցության ղեկավար Հայկ Կոնջորյանին, Բադալյանի կարծիքով՝ դա կարող է նշանակել, որ եթե հունիսի 7-ի ընտրություններով ՔՊ-ն կրկին իշխանության գա, ապա Ալեն Սիմոնյանը կարող է այլևս չլինել ԱԺ նախագահ։
Իսկ ինչ վերաբերում է ՔՊ վարչության ընտրությունների և այս ընտրությունների արդյունքների տարբերություններին, քաղաքագետի կարծիքով՝ այստեղ էլ ենթադրություններ անել կամ տրամաբանական կապեր պետք չէ որոնել, որովհետև դա էլ է կուսակցության առաջնորդի քմահաճույք։
«Լիդերային կուսակցությունում լիդերն է որոշում՝ ըստ իր ունեցած պատկերացումների, դա միայն ինքը կարող է ասել, ոչ մի վերլուծաբան չի կարող ասել, օրինակ, ինչո՞ւ ինքն այդպես որոշեց, այսինքն՝ այս ցուցակի ձայներով իմաստ չունի ինչ-որ ներկուսակցական ուժերի հարաբերակցություն փորձել պարզել։ Դա կարող է լինել ժողովրդավարական երկրներում՝ բաց գործընթացի դեպքում, երբ որ փակ գործընթաց է տեղի ունեցել, չես կարող ոչինչ ասել»,- նկատեց նա։
Տևական ժամանակ է՝ մամուլում տեղեկություններ են շրջանառվում, թե ԱՄՆ-ում ՀՀ նախկին դեսպան, վարչապետի խորհրդական Լիլիթ Մակունցն ընտրություններից հետո ԱԺ նախագահ է նշանակվելու։ Ընտրական ցուցակում նա 21-րդն է։ Բադալյանի խոսքով՝ կապ չունի, թե Մակունցը կամ մեկ այլ ՔՊ-ական որ տեղում է, եթե ՔՊ առաջնորդը ցանկացավ, որ նա գլխավորի ԱԺ-ն, ուրեմն այդպես կլինի։
