Գյումրիի քաղաքապետարանի շենքի դիմաց իրավիճակը կտրուկ լարվել է։ Ոստիկանության մեծ ուժեր են այստեղ կենտրոնացված։ Նրանց և ի պաշտպանություն քաղաքապետ Վարդան Ղուկասյանի հավաքված քաղաքացիների միջև հրմշտոց է սկսվել։ Ոստիկանները սկսեցին բերման ենթարկել քաղաքացիներին։
Հրմշտոցի հետևանքով լրագրողները չեն կարողանում իրենց մասնագիտական պարտքն իրականացնել և լուսաբանել տեղի ունեցողը։
Նշենք, որ Գյումրիում են փոխոստիկանապետեր Կամո Վարդանյանը, Կարեն Հակոբյանը, նաև պարեկային ծառայության պետ Արթուր Խուդինյանը։
Ավելի վաղ NEWS.am–ը հայտնել էր, որ ուժային կառույցների աշխատակիցները վաղ առավոտյան մտել են Գյումրիի քաղաքապետարան։
Դիմակավորված հատուկջոկատայինները արգելել են աշխատակիցների ելքն ու մուտքը։ Քաղաքացիներ են հավաքվել քաղաքապետարանի դիմաց, որտեղ մեծ թվով ոստիկանական ուժեր են բերվել, որոնց թիվը գնալով շատանում է։ Իրավիճակը լարված է։ Ինչ–որ պահի նույնիսկ քաշքշուկ տեղի ունեցավ ոստիկանների ու հավաքված քաղաքացիների միջև։
Լարված է նաև քաղաքապետարանի ներսում։ Քաղաքապետ Վարդան Ղուկասյանին մեկուսացրել են և դռան մոտ զինված ոստիկաններ են կանգնած։ Աշխատակիցները փորձում են ներս մտնել և թույլ չտալ, որ քաղաքապետին ձերբակալեն։ Քիչ առաջ Վարդան Ղուկսյանը դուրս եկավ աշխատասենյակից և հանգստության կոչ արեց բոլորին, ասելով, որ հիմա օրենքով ամեն ինչ կանեն, հետո կտեսնեն՝ ինչ կլինի։
Նշենք, որ Երևանից ոստիկանական շարասյուն է ուղևորվել Գյումրի։
Ավելի ուշ Հակակոռուպցիոն կոմիտեն հաղորդագրություն տարածեց, նշելով, որ քաղաքապետարանի 8 աշխատակիցներ, այդ թվում քաղաքապետ Վարդան Ղուկասյանը, ձերբակալվել են կաշառք ստանալու և տալու մեղադրանքներով։
Ձերբակալվածների թվում է նաև քաղաքի գլխավոր ճարտարապետ Հենրիկ Գասպարյանը։ Հակակոռուպցիոն կոմիտեի տարածած հաղորդագրության մեջ կար գաղտնալսված մի ձայնագրություն, որտեղ խոսակցություն էր քաղաքապետի ու գլխավոր ճարտարապետի միջև։
