Միավորված Ազգերի Կազմակերպության Անվտանգության խորհրդի նիստում Ուկրաինան քննադատել է Ռուսաստանի հետ խորհրդակցությամբ Միացյալ Նահանգների մշակած խաղաղության ծրագիրը: ՄԱԿ-ում Ուկրաինայի մշտական ներկայացուցչի տեղակալ Քրիստինա Գայովիշինը հիշեցրել է Կիևի «հստակ և անփոփոխ կարմիր գծերը» պետության տարածքային ամբողջականության և ինքնիշխանության վերաբերյալ: «Մենք երբեք՝ ոչ պաշտոնապես, ոչ էլ այլ կերպ, Ռուսաստանի Դաշնության կողմից ժամանակավորապես օկուպացված Ուկրաինայի տարածքը չենք ճանաչի որպես ռուսական: Մեր հողը չի վաճառվում»,- ընդգծել է նա:
Ուկրաինան նաև չի համաձայնի ինքնապաշտպանության իրավունքի սահմանափակումներին, այդ թվում՝ բանակի կրճատմանը կամ դաշինքներ ընտրելու արգելքին, շարունակել է Գայովիշինը: Նրա խոսքով՝ երկրի պաշտպանության ամրապնդումը չի կարող համարվել լարվածության սրացում. դա Ռուսաստանին խաղաղության ձգտել ստիպելու միակ միջոցն է: Հակառակ դեպքում, վստահություն է հայտնել Գայովիշինը, Կրեմլը կսկսի պատերազմն արտահանել այլ տարածքներ: «Մենք չենք խրախուսի ռուսական ագրեսիայի հիմքում ընկած ցեղասպանական մտադրությունը, որը խաթարում է մեր ինքնությունը, մասնավորապես՝ մեր լեզուն: <…> Պատմությունը կլինի անողոք դատավոր, եթե Ռուսաստանը, ի վերջո… պատասխանատվության չենթարկվի»,- զգուշացրել է նա: Գայովիշինն ավելացրել է, որ Կիևը պատրաստ է կառուցողական բանակցությունների Ռուսաստանի հետ, այդ թվում՝ նախագահական մակարդակով, սակայն խաղաղության գործընթացը պետք է հետևի հետևյալ սկզբունքին՝ «Ոչինչ Ուկրաինայի մասին՝ առանց Ուկրաինայի, և ոչինչ Եվրոպայի մասին՝ առանց Եվրոպայի»։
ԱՄՆ նոր 28 կետանոց ծրագիրը, որը մշակվել է նախագահ Դոնալդ Թրամփի հատուկ բանագնաց Սթիվ Ուիթքկոֆի կողմից՝ Ռուսաստանի նախագահի բանագնաց Կիրիլ Դմիտրիևի մասնակցությամբ, նախատեսում է Ղրիմի և Դոնբասի հանձնում Ռուսաստանի վերահսկողությանը, Ուկրաինայի զինված ուժերի կրճատում, Ուկրաինայի հրաժարում ՆԱՏՕ-ին անդամակցելուց և նրա տարածքում օտարերկրյա ուժերի տեղակայման արգելք։
Axios-ի աղբյուրները նշել են, որ Կիևը և եվրոպական մայրաքաղաքները «շոկի մեջ են» այդ ծրագրից։ Ուկրաինայի կառավարության անանուն աղբյուրը NBC-ին ասել է, որ նման առաջարկների ի հայտ գալը նախագահ Վլադիմիր Զելենսկու մերձավոր շրջապատում կոռուպցիոն սկանդալի ֆոնին կարող է վկայել իրավիճակից օգտվելու Մոսկվայի փորձի մասին։
Զելենսկին ինքը համաձայնել է քննարկել պատերազմը դադարեցնելու փաստաթղթի դրույթները, որտեղ ուրվագծվում են «հիմնարար սկզբունքները, որոնք կարևոր են Ուկրաինայի ժողովրդի համար»։ «Մենք չենք անելու բարձրագոչ հայտարարություններ և հանձնառու ենք հստակ, ազնիվ աշխատանքի՝ Ուկրաինան, Միացյալ Նահանգները և մեր ընկերներն ու գործընկերները Եվրոպայում և ամբողջ աշխարհում»,- ասել է նա ԱՄՆ բանակի նախարար Դանիել Դրիսքոլի հետ հանդիպումից հետո։
Իրենց հերթին, ուկրաինացի պաշտոնյաները Financial Times-ին ասել են, որ պատրաստում են կարգավորման հանդիպակաց առաջարկներ, որոնք շուտով կներկայացնեն ամերիկացիներին։ Սպիտակ տունն ակնկալում է, որ Զելենսկին կընդունի ԱՄՆ ծրագիրը մինչև նոյեմբերի 27-ը՝ Երախտագիտության օրը։ Դրանից հետո Վաշինգտոնը խաղաղության համաձայնագիրը կներկայացնի Մոսկվային՝ պատերազմը դեկտեմբերի սկզբին ավարտելու համար։
News.am
