Մոսկվան ստացել է ևս չորս փաստաթուղթ՝ որպես հավելում Ուկրաինայի կարգավորման վերաբերյալ Թրամփի 28 կետից բաղկացած նախնական պլանի, Վլադիմիր Պուտինի ու ԱՄՆ նախագահի հատուկ բանագնաց Սթիվեն Ուիտկոֆի հանդիպումից հետո հայտարարել է ՌԴ նախագահի օգնական Յուրի Ուշակովը։ Զրույցը օգտակար էր և կառուցողական, հավելել է Ուշակովը։
Նրա խոսքով ՝ Ռուսաստանն ու ԱՄՆ-ը պայմանավորվել են, որ չեն հրապարակի բանակցությունների բովանդակությունը։
Գլխավորը՝ հանդիպումից
– Պուտինը հայտարարել է, որ Մոսկվան ինչ-որ բանի հետ կարող է համաձայնել Ուկրաինայի հարցով ԱՄՆ-ի ծրագրի շրջանակներում, սակայն ինչ-որ բան ռուսական կողմի քննադատությունն է առաջացնում:
– Կողմերը հայտարարել են Ուկրաինայում կարգավորման հասնելու համար համատեղ աշխատանքը շարունակելու պատրաստակամության մասին:
– ԱՄՆ նախագահի ներկայացուցիչները Պուտինին են փոխանցել Թրամփի ողջույններն ու բարեմաղթանքները: Պուտինն ի պատասխան ողջույններ և մի շարք քաղաքական ազդակներ է փոխանցել Թրամփին:
– Պուտինի և Թրամփի հանդիպման հնարավորությունը կախված կլինի նրանից, թե ինչ առաջընթաց կգրանցվի կարգավորման ճանապարհին։
Հավելենք, որ Վլադիմիր Պուտինի հանդիպումը Ուիտկոֆի և Քուշների հետ տևել է գրեթե 5 ժամ։
Ուիտկոֆն այս տարվա ընթացքում արդեն վեցերորդ անգամ է այցելում Ռուսաստան։ Այս այցը կապված է Ուկրաինայի վերաբերյալ ամերիկյան ծրագրի քննարկման հետ։
Նախագահ Դոնալդ Թրամփի օրոք ԱՄՆ վարչակազմը ակտիվ աշխատում է ուկրաինական կարգավորման առաջարկների ուղղությամբ։ Վաշինգտոնի հայտարարությունների համաձայն՝ փաստաթուղթը դեռ մշակման փուլում է, սակայն Ռուսաստանի հետ շփումներն արդեն սկսվել են։
Ամերիկյան կողմը նախնական նյութեր է ուղարկել Մոսկվա, իսկ Թրամփը բազմիցս ընդգծել է բանակցություններում առկա «առաջընթացը»։
Կրեմլը հաստատում է, որ խորհրդակցություններ են ընթանում, բայց դրանք փակ են։
Ռուսաստանի նախագահ Վլադիմիր Պուտինը հայտարարել է, որ ամերիկյան «հայեցակարգը» կարող է հիմք հանդիսանալ ապագա համաձայնագրի համար, սակայն մանրամասն քննարկումներ դեռ չեն եղել։ Մոսկվան, նրա խոսքով, ակնկալում է, որ ԱՄՆ-ն կներկայացնի համաձայնեցված տարբերակ, որը կներառի Կիևի դիրքորոշումը։
ՌԴ նախագահի մամուլի քարտուղար Դմիտրի Պեսկովը նույնպես նշել է, որ Ռուսաստանը բաց է երկխոսության համար, սակայն որոշումն այժմ մեծապես կախված է Ուկրաինայից, քանի որ Կիևի մանևրելու տարածքը կրճատվում է ռազմական գործողությունների ֆոնին։
Sputnik Արմենիա
