Միջազգային ջրերում այլ երկրների նավերի գրավումը ԱՄՆ-ի կողմից լրջորեն խախտում է միջազգային իրավունքը։ Այս մասին այսօր ճեպազրույցի ժամանակ հայտարարել է Չինաստանի ԱԳՆ պաշտոնական ներկայացուցիչ Մաո Նինը՝ մեկնաբանելով ԱՄՆ-ի կողմից «Մարիներա» նավթալցանավի կալանավորումը: Նրա խոսքերը մեջբերում է ՌԻԱ Նովոստին։
«Միացյալ Նահանգների կողմից միջազգային ջրերում այլ երկրների նավերի կամայական կալանավորումը միջազգային իրավունքի լուրջ խախտում է», – հայտարարել է Մաո Նինը:
Նախօրեին ԱՄՆ Զինված ուժերի Եվրոպական հրամանատարությունը հայտնել էր, որ ամերիկյան պատժամիջոցների ռեժիմը խախտելու համար Միացյալ Նահանգների իշխանությունները Ատլանտյան օվկիանոսի հյուսիսային մասում կալանավորել են ռուսական «Մարիներա» նավթալցանավը: ՌԴ տրանսպորտի նախարարության հայտարարությամբ՝ բաց ծովում ամերիկյան ուժեր իջեցնելը նավի վրա հակասում է 1982թ. ՄԱԿ-ի ծովային իրավունքի Կոնվենցիային։
ՌԴ ԱԳՆ-ն հայտարարել է, որ հետևում է Ատլանտյան օվկիանոսի հյուսիսային մասում Ռուսաստանի դրոշի ներքո նավարկող «Մարիներա» նավի վրա ԱՄՆ զինվորականների իջեցման մասին հաղորդագրություններին և, հաշվի առնելով անձնակազմի անդամների շրջանում ռուսների մասին տեղեկատվությունը, Միացյալ Նահանգներից պահանջում է նրանց վերաբերվել արժանապատվորեն, խստորեն պահպանել անձնակազմի իրավունքներն ու շահերը, ինչպես նաև չխոչընդոտել ծովայինների շուտափույթ վերադարձին հայրենիք:
Հունվարի 6-ին ՌԴ ԱԳՆ-ն ՌԻԱ Նովոստիին հայտնել էր, որ Մոսկվայում տագնապով հետևում են ռուսական «Մարիներա» նավթային լցանավի շուրջ ստեղծված անոմալ իրավիճակին, որը նավարկում էր Ատլանտյան օվկիանոսի հյուսիսային շրջանի միջազգային ջրերում՝ Ռուսաստանի դրոշի ներքո, միջազգային ծովային իրավունքի նորմերին լիովին համապատասխան: Գերատեսչությունն ընդգծել էր, որ անհասկանալի պատճառներով ԱՄՆ-ի և ՆԱՏՕ-ի զինվորականների կողմից բարձր և ակնհայտորեն անհամաչափ ուշադրություն է դարձվում խաղաղ կարգավիճակ ունեցող ռուսական լցանավին: ԱԳՆ-ն նշել էր, որ ակնկալում է, որ արևմտյան երկրները, որոնք հանձնառու են բաց ծովում նավարկության ազատությանը, այդ սկզբունքն իրացնելը կսկսեն իրենցից:
Sputnik Արմենիա
