ՀՀ պաշտպանության նախարարության ծախսերի կրճատումը չի անդրադառնա արդեն իսկ մեկնարկած ծրագրերի վրա։ ԱԺ–ում լրագրողների հետ ճեպազրույցում այս մասին ասաց ՀՀ պաշտպանության նախարարի տեղակալ Արման Սարգսյանը` միևնույն ժամանակ նշելով, թե «կրճատումը» զուտ լրագրողների ձևակերպումն է։
Ավելի վաղ հայտնել էիք, որ 2025 թ. ՀՀ պետական բյուջեի համեմատ` 2026 թվականին պաշտպանության նախարարության ծախսերը կկրճատվեն 15,3 %–ով և կկազմեն 563,1 մլրդ դրամ: Բացարձակ թվերով կրճատումը կկազմի 101,5 մլրդ դրամ։
«Կարող եմ ձեզ վստահեցնել, որ այն բարեփոխումները, որոնք ընթացքի մեջ են, շարունակվելու են։ ՀՀ վարչապետն ԱԺ ամբիոնից հանգամանալից ներկայացրել է այս հարցի պատասխանը, իսկ ամենից կարևորն այն է, որ մեկնարկած որևէ բարեփոխում չի կանգնեցվելու և մոտենալու է իր տրամաբանական ավարտին»,– ասաց նա։
Փոխնախարարը հավելեց, որ իր նախարարության ֆինանսաբյուջետային հարցերն իր ղեկավարման տիրույթում չեն, ու շատ մանրամասների չի տիրապետում։
Հիշեցնեք, որ սեպտեմբերի 10–ին ԱԺ–ում կառավարության հետ հարցուպատասխանի ժամանակ ՀՀ վարչապետ Նիկոլ Փաշինյանն ասել էր, որ 2025 թվականին` 2024–ի համեմատ, ՀՀ պաշտպանական ոլորտում շատ էական ու կտրուկ աճ ենք ունեցել` անհամաչափ աճ` 115 մլրդ դրամի չափով, որը հիմնականում պայմանավորված է եղել հրատապ կարիքներով։ Փաշինյանի խոսքով` այդ ծախսերի մի մասը ՀՀ կառավարությունն ուղղել է պարտքերի ու պարտավորությունների մարմանը, այդ թվում` պաշտպանության ոլորտում։
Sputnik Արմենիա
