Իշխանությունը փորձում է 44-օրյա զոհերի թեման տեղափոխել տեխնիկական խնդիրների տիրույթ, երբ բանավեճը նրա տարբեր ներկայացուցիչների հնչեցրած թվերի դաշտում է, գրել է ԱԺ «Պատիվ ունեմ» խմբակցության քարտուղար Տիգրան Աբրահամյանը։
Պատգամավորը մատնանշել է, որ իրականում պատերազմի թիվ մեկ խնդիրն այն է, որ նահատակների, անհետ կորածների, գերեվարվածների ծնողների ու հասարակության հարցադրումները պատերազմի տարբեր հանգամանքների և դրա պատասխանատուների վերաբերյալ, շարունակում են անպատասխան մնալ:
«Իշխանությունն ընտրովի մեղավորներ է նշանակել, որոնք, բնականաբար, իր և իր առաջնորդից տիրույթից դուրս են․ քննիչ հանձնաժողովի զեկույցը բարեհաջող թաղվեց, իսկ իրական պատասխանատուները բացի փողոցում հայտնվելուց ամեն ինչով զբաղվում են` քաղբանտարկյալների ցուցակն ընդլայնելով, պետական շահը սակարկման առարկա դարձնելով և երկրի կենսունակությունն ապահովող ինստիտուտները քանդելով»,- հավելել է նա։
ԱԺ նախագահ Ալեն Սիմոնյանը հայտարարել էր, որ 2020 թվականին տեղի ունեցած 44-օրյա պատերազմի հետևանքով զոհվել է 3833 անձ։ ԱԺ նախագահի խոսքով՝ նրանցից 3755-ը զինծառայող է, 78-ը՝ քաղաքացիական անձ։ Նաև անհետ կորած է 191 անձ, որոնցից 172-ը զինծառայող է, 19-ը՝ քաղաքացիական անձ։
