Պաշտպանության նախարարության համակարգում դժգոհություններ կան նախարար Սուրեն Պապիկյանի քաղաքական գործունեության վերաբերյալ, քանի որ վերջինս պատշաճ ուշադրություն չի դարձնում իր ղեկավարած ոլորտի խնդիրներին՝ ակտիվորեն ներգրավվելով նախընտրական քարոզչությանը, գրել է «Հրապարակ» օրաթերթը։
Պարբերականն այս առումով որպես օրինակ է բերում Պապիկյանի հրապարակումը: Նա մարտի 31-ին իր պաշտոնական էջում զետեղել էր «Ուժեղ Հայաստան» կուսակցության մասին Հակակոռուպցիոն կոմիտեի տեսանյութը, որով հայտնում էին Արմավիրում իբր թե ենթադրյալ ընտրակաշառք բաժանելու մասին։
Մինչդեռ, ըստ լրատվամիջոցի՝ համակարգում արձանագրվում են մահվան և բռնության դեպքեր։
Մասնավորապես, Արարատի զորամասում սրտի կանգից մահացել է գումարտակի հրամանատարի մոտ 40 տարեկան տեղակալը։ ՊՆ խոսնակ Արամ Թորոսյանի պարզաբանմամբ՝ սպայի մահը տեղի է ունեցել շաբաթներ առաջ և դասակարգվում է որպես ծառայության հետ չկապված հանգամանքներում առողջական պատճառով արձանագրված դեպք, ինչի վերաբերյալ գերատեսչությունը պաշտոնական իրազեկում չի կատարում։
Բացի այդ, թերթը հիշեցրել է Վարդենիսի զորամասում տեղի ունեցած դանակահարության մասին, որի վերաբերյալ ՊՆ-ն տարածել էր սակավախոս հաղորդագրություն՝ նշելով, թե դեպքն արձանագրվել է վարժական հավաքի ընթացքում։ Մինչդեռ, ըստ աղբյուրի, միջադեպը տեղի է ունեցել հենց մարտական դիրքերում՝ սահմանի պահպանության ժամանակ։
Armenia Today
