Ռուսաստանի «Ռոսատոմ» պետական կորպորացիան առաջարկում է Հայաստանում ստեղծել ջրային օբյեկտների և մթնոլորտային օդի բնապահպանական մոնիթորինգի ինտեգրված համակարգեր։ Այս մասին հայտնում է Երևանում ՌԴ դեսպանատան մամուլի ծառայությունը՝ դեսպան Սերգեյ Կոպիրկինի և ՀՀ շրջակա միջավայրի նախարար Համբարձում Մաթևոսյանի հանդիպման արդյունքներով:
Նշվում է, որ հանդիպմանը մասնակցել են Հայաստանում Ռուսաստանի առևտրային ներկայացուցիչ Սերգեյ Սոլոմինը, առևտրային ներկայացուցչության թվային կցորդ Ալեքսեյ Օրդինը և Ռուսաստանի տնտեսական զարգացման նախարարության ներկայացուցիչ Անաստասիա Իվանովան: Կողմերը քննարկել են բնապահպանության, բնօգտագործման և բնապահպանական թվային մոնիթորինգի ոլորտներում հայ-ռուսական փոխգործակցության զարգացմանը վերաբերող հարցերի լայն շրջանակ:
«Հատուկ ուշադրություն է դարձվել ջրային օբյեկտների և մթնոլորտային օդի բնապահպանական մոնիթորինգի ինտեգրված համակարգերի ստեղծման վերաբերյալ «Ռոսատոմ» պետական կորպորացիայի առաջարկներին, ինչպես նաև թափոնների գործածության և բնապահպանական վերահսկողության թվայնացման ոլորտում ռուսական տեխնոլոգիաների կիրառման հնարավորություններին», – ասվում է մամուլի ծառայության հաղորդագրությունում:
Դեսպանատան հաղորդմամբ՝ Հայաստանում Ռուսաստանի առևտրային ներկայացուցիչ Սոլոմինը ընդգծել է կայուն զարգացման նպատակների իրագործմանն ուղղված մրցույթներին և նախագծերին Ռուսաստանի առաջատար ընկերություններին ներգրավելու հարցում հայկական կողմին աջակցելու պատրաստակամությունը:
Sputnik Արմենիա
