Նախօրեին Սուրբ Գևորգ եկեղեցում, Արագածոտնի թեմի Վարչական խորհրդի ատենապետ Հոգեշնորհ Տեր Շնորհք աբեղա Պալոյանի հանդիսապետությամբ, կատարվել է հերթական միասնական ժամերգությունը:
Ներկաներն աղոթք են բարձրացրել անազատության մեջ հանիրավի գտնվող թեմի առաջնորդ Մկրտիչ Սրբազանի, հոգևոր հայրերի, եղբայրների և զավակների, գերեվարված հայորդիների, հայրենիքի ու Սուրբ Եկեղեցու համար:
Ժամերգության ավարտին իր խոսքը ներկաներին ուղղել է Կոշի Սուրբ Գևորգ եկեղեցու հոգևոր հովիվ՝ Արժանապատիվ Տեր Ղևոնդ քահանա Գափոյանը: Տեր Ղևոնդը հույս է հայտնել, որ շուտով արդարություն կլինի ու Սրբազան Հայրերն ազատության մեջ կկարողանան իրենց աղոթքը բարձրացնել առ Աստված։
««Ստախոս շուրթերը պիղծ են Տիրոջ առաջ, իսկ հավատքով շարժվողն ընդունելի է Նրան», Առակաց 12:22: Այս է մեզ պատգամում Ավետարանը:
Կա չարիք, որը ոչ միայն հենց իր համար է չարիք, այլև ուրիշների, և այդ շարքից է սուտ վկայությունը: Նմանատիպ մարդկանց մեջ ոճրագործության չափը կրկնապատկվում է, որովհետև սուտ վկայություն տվողն իրեն կամովին չարքին է մատնում ու ուրիշներին քաշում դրա մեջ։ Սուտ վկայությունը վնասում է դիմացինին՝ ենթարկելով տանջանքի:
Ամեն ինչին ժամանակ կա, սա էլ կանցնի, ոչինչ, մեր հոգևոր հավատքը անկոտրում է։ Ինձ համար շատ կարևոր է հայրենիքիս խաղաղությունը, ինչպես նաև հոգևոր ազատությունը։ Իմ հայրենիքը պետք է շեն լինի, ազատ հավատքով ապրի։ Ուզում եմ իմ Առաջնորդ Սրբազան Հոր, ինչպես նաև մյուս հոգևոր ծնողներին աղոթքով ձեզ գլխավորելիս տեսնենք, ազատության մեջ: Ես վստահ եմ, որ հիմա մեր Առաջնորդը հոգով, մտքով, աղոթքով մեզ հետ է և այս պահին նրա բացակայությունը միայն ֆիզիկապես է…»,- ասել է Տեր Ղևոնդը:
Միասնական ժամերգությունն ավարտվել է Հայր Սուրբի Պահպանիչ աղոթքով:
Արագածոտնի թեմից հայտնում են, որ փետրվարի 12-ին, ժամը 19:00-ին միասնական ժամերգությունը տեղի կունենա Արուճի Սուրբ Աստվածածին եկեղեցում:
News.am
