Սպիտակ տունը հերքել է ԱՄՆ-ի կողմից Իրանի դեմ քրդերին օգտագործելու ծրագրերի մասին հաղորդագրությունները՝ դրանք որակելով «անհիմն», հայտարարել է Սպիտակ տան մամուլի քարտուղար Քերոլայն Լևիտը։
Նա հաստատել է, որ ԱՄՆ նախագահ Դոնալդ Թրամփը հեռախոսազրույցներ է ունեցել «քուրդ առաջնորդների» հետ։
«Նա խոսել է քուրդ առաջնորդների հետ Հյուսիսային Իրաքում մեր բազայի վերաբերյալ։ Սակայն, ցանկացած հաղորդագրություն, որ նախագահը համաձայնել է նման որևէ ծրագրի, բացարձակապես անհիմն է և չպետք է հրապարակվի»,- Լևիտի խոսքերն է մեջբերել ՏԱՍՍ-ը։
Միևնույն ժամանակ, CNN-ը աղբյուրներին հղում անելով ավելի վաղ հաղորդել էր, որ ԿՀՎ-ն աշխատում է քրդական ուժերին զինելու ուղղությամբ՝ Իրանում գործողությունների համար։ Աղբյուրների համաձայն՝ Իրանի քրդական ընդդիմադիր ուժերն «առաջիկա օրերին» կմասնակցեն արևմտյան Իրանում ցամաքային գործողության։ Մասնավորապես, աղբյուրները նշել են, որ Թրամփի վարչակազմն ակտիվորեն բանակցություններ է վարել իրանական ընդդիմադիր խմբավորումների և Իրաքի քուրդ առաջնորդների հետ՝ ռազմական աջակցության վերաբերյալ։
CNN-ը նշում է, որ իրանական քրդական խմբավորումները հազարավոր մարտիկներ են պատրաստում, որոնք գործում են Իրան-Իրաք սահմանի երկայնքով, հիմնականում՝ Իրաքյան Քուրդիստանում։ Պատերազմի սկսվելուց ի վեր մի քանի խմբավորում հայտարարություններ է տարածել՝ նշելով հնարավոր գործողությունների մասին և կոչ անելով Իրանի զինված ուժերին լքել իրենց դիրքերը։
Ըստ աղբյուրներից մեկի՝ ԿՀՎ-ի աջակցությունն իրանական քրդական խմբավորումներին սկսվել է պատերազմից մի քանի ամիս առաջ։ Նա հավելել է, որ քրդական խմբավորումները հույսը դնում են ԱՄՆ-ի և Իսրայելի աջակցության վրա։ Հրատարակությունը նշում է, որ իրանական քրդական խմբավորումներին զինելու ցանկացած փորձ կպահանջի իրաքյան քրդերի աջակցությունը՝ զենքի տարանցումն ապահովելու և Իրաքյան Քուրդիստանը որպես ցատկահարթակ օգտագործելու համար։
«Դա շատ վտանգավոր է, բայց ի՞նչ կարող ենք անել։ Մենք չենք կարող դիմակայել Ամերիկային։ Մենք շատ վախեցած ենք»,- CNN-ը մեջբերում է Իրաքյան Քուրդիստանի տարածաշրջանային կառավարության անանուն պաշտոնյայի խոսքերը։
The Wall Street Journal-ը հայտնել էր Իրանի կառավարության դեմ գործողություններում քրդերի հնարավոր ներգրավվածության մասին։ Հրատարակության համաձայն՝ Թրամփը կարող է աջակցել իրանական խմբավորումներին, որոնք պատրաստ են զենք վերցնել՝ Իրանի ներկայիս կառավարությունը տապալելու համար։ Հաղորդվել է նաև, որ ԱՄՆ նախագահը մարտի 1-ին հեռախոսով քննարկել էր Իրանի դեմ պատերազմն Իրաքի քրդական առաջնորդների՝ Քուրդիստանի դեմոկրատական կուսակցության առաջնորդ Մասուդ Բարզանիի և հայրենասիրական միության առաջնորդ Բաֆել Թալաբանիի հետ։
Փետրվարի 28-ին ԱՄՆ-ն և Իսրայելը մի շարք հարվածներ էին հասցրել Իրանի տարբեր թիրախների, որոնց հետևանքով զոհվել էին բազմաթիվ բարձրաստիճան պաշտոնյաներ, այդ թվում՝ Գերագույն առաջնորդ այաթոլլահ Ալի Խամենեին։ Երկու օր անց նրա կինը՝ Մանսուրե Խոջաստ Բաղերզադեն, մահացել էր ստացած վնասվածքներից։ Թեհրանը պատասխանել էր տարածաշրջանում ԱՄՆ-ի և Իսրայելի մի քանի թիրախ հարվածելով:
Իրանի նախագահ Մասուդ Փեզեշքիանը հայտարարել էր, որ Գերագույն առաջնորդին սպանելով՝ ԱՄՆ-ն և Իսրայելը «պատերազմ են հայտարարել աշխարհի մուսուլմաններին» և խոստացել պատասխան միջոցներ ձեռնարկել: Մարտի 2-ին Թրամփը հայտարարել էր, որ նախնական գնահատականներով՝ հակամարտությունը, ենթադրաբար, կտևի 4-5 շաբաթ, բայց չէր բացառել դրա երկարաձգման հնարավորությունը:
Armenia Today
