«Սրբազան պայքարի» գործով անցնող Վահագն Չախալյանի նկատմամբ կիրառված խափանման միջոց կալանքը չի փոխվում։ Երևանի առաջին ատյանի ընդհանուր իրավասության դատարանը՝ Կարեն Ֆարխոյանի նախագահությամբ, որոշեց խափանման միջոցը փոփոխելու վերաբերյալ միջնորդությունը քննության առարկա չդարձնել, քանի դեռ նոր հանգամանքներ ի հայտ չեն եկել։
Ըստ պաշտպանի ներկայացրած միջնորդության՝ ընտանիքը բնակվում է Քասախ գյուղում, 2 անչափահաս երեխաները Երևանում դպրոց են հաճախում, ինչը մեծ դժվարություն է դարձել ընտանիքի հոր ազատազրկումից հետո։ Չախալյանի ավագ որդին ուսանող է, որի տարեկան ուսման վարձը 950 հազար դրամ է, դուստրը մասնավոր դպրոցում է սովորում, տարեկան ուսման վարձն 850 հազար դրամ է, բացի այդ ընտանիքն ունի հիփոթեքային վարկ և այլևս չի կարողանում ժամանակին կատարել վճարումները։ Ընտանիքի ֆինանսական ամբողջ բեռը Վահագն Չախալյանի ուսերին է։ Պաշտպանը նաև ընդգծեց, որ «Սրբազան պայքարի» գործով անցնող 18 անձանցից այսօր ազատազրկված են մնում Բագրատ սրբազանն ու Վահագն Չախալյանը։
Դատարանը նշեց, որ այս հանգամանքներն արդեն ավելի վաղ ներկայացվել էին, և դատարանը որոշել էր, որ որևէ այլ խափանման միջոց ի զորու չէ ապահովելու մեղադրյալի պատշաճ վարքագիծը։
Հիշեցնենք` «Կամք» նախաձեռնության ղեկավար և ակտիվիստ Վահագն Չախալյանը կալանավորված է 2025 թվականի հուլիսի 5–ից։
Ըստ ՀՀ քննչական կոմիտեի` «Սրբազան պայքար» շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։
Sputnik Արմենիա
