Գերմանացի քաղաքագետ Վլադիմիր Սերգիենկոն Alpha News-ին տված հարցազրույցում մեկնաբանել է ՀՀ վարչապետ Նիկոլ Փաշինյանի այցը Ֆրանսիա։
«Փաշինյանն աշխատում է ներքին շուկայի վրա, որին ժամանակ առ ժամանակ անհրաժեշտ է արտաքին եվրոպական խաղացողների աջակցությունը, որոնք ուշադրություն են ցուցաբերում երկրի և ժողովրդի նկատմամբ, ինչպես նաև ներգրավված են այն գործընթացներում, որոնք կարճաժամկետ հեռանկարում առնչվում են բնակչությանը։ Իհարկե, Հայաստանը տարածաշրջանի կայունացման գործոններից մեկն է, բայց ապագայում այս իրավիճակը կարող է փոխվել։ Փոփոխությունները կարող են կապված լինել ռազմական ծրագրերի հետ, որոնք Ֆրանսիան յուրացնում է Հայաստանի հետ համատեղ։ Երբ խոսքը հրահանգիչների, փորձի փոխանակման մասին է, դա մի բան է, բայց անօդաչու թռչող սարքերի, ռադիոլոկացիոն կայանների և այդ կայանների համար անձնակազմի պատրաստման մասին խոսակցությունն արդեն շոշափում է տարածաշրջանի գլոբալ խաղացողների շահերը»,- ասել է Սերգիենկոն։
Փորձագետի կարծիքով՝ Ֆրանսիայից զենքի գնումները և Հայաստանի մասնակցությունը ՆԱՏՕ-ի որոշակի գործընթացներին ուղղակի մարտահրավեր են Ռուսաստանի համար։
«Հարկ է նշել նաև ՆԱՏՕ-ի չափանիշներին համապատասխան դիվերսիֆիկացիան ՝ ճանապարհ, որն անցել են Ուկրաինան, Վրաստանը և այժմ Մոլդովան։ Սա չի նշանակում, որ երկիրը կարճաժամկետ կամ երկարաժամկետ հեռանկարում կմիանա ԵՄ-ին կամ ՆԱՏՕ-ին։ Խոսքը տարածաշրջանում արտաքին խաղացողների ներկայության քաղաքականության ձևավորման մասին է։ Այսօր չի կարելի վստահ լինել, որ դա կկայունացնի իրավիճակը. Ֆրանսիայից զենքի գնումները և Հայաստանի մասնակցությունը ՆԱՏՕ-ի որոշակի գործընթացներին ուղղակի մարտահրավեր են Ռուսաստանի համար։
Արդյոք դա իմաստո՞ւն քայլ է, աշխատանք ընտրազանգվածի հետ, թե՞ իշխանությունը պահելու փորձ։ Ո՛չ, դա Փաշինյանի անձնական կարծիքն է, որը դուր է գալիս Ֆրանսիային։ Ֆրանսիան գործիքների կարիք ունի Ռուսաստանի վրա ճնշում գործադրելու և Կովկասյան տարածաշրջանը հնարավորինս ապակայունացնելու համար։ Եվրամիությունն ու ՆԱՏՕ-ն դիտարկում էին դա երկար տարիներ»,- նշել է Սերգիենկոն։
Քաղաքագետի խոսքով՝ Փաշինյանը փորձում է «նստել մի քանի աթոռի վրա»։
«Այսօր ես կարծում եմ, որ Փաշինյանը կոպիտ սխալ է գործում միջազգային հարաբերություններում՝ փորձելով «մի քանի աթոռի վրա նստել»։ Նա պետք է որոշում կայացնի, հնարավոր է՝ չեղարկի որոշ միջպետական համաձայնագրեր, որպեսզի պարզ դառնա, թե որքանով կայուն կլինի տարածաշրջանը, և ինչպես կարձագանքեն արտաքին խաղացողները ՆԱՏՕ-ի ռադիոլոկացիոն կայաններին, որոնք առաջիկա 10 տարիների համար մարտական վիճակի են բերված ՀՀ տարածքում»,- եզրափակել է Սերգիենկոն։
