Հայաստանի վարչապետ Նիկոլ Փաշինյանն անդառնալիորեն կորցրել է լեգիտիմությունը։ Այս մասին սեպտեմբերի 26-ին Երևանում՝ «Ազգային ճգնաժամի և կառավարման ձախողման մասին» Ազգային ժողովի հայտարարության նախագծի շուրջ անցկացվող խորհրդարանական լսումների ժամանակ, հայտարարել է ընդդիմադիր պատգամավոր, Հայաստանի Հանրապետական խմբակցության անդամ Տիգրան Աբրահամյանը։
Նրա իշխանության գլուխ լինելը, ըստ պատգամավորի, սպառնալիք է ներկայացնում Հայաստանի Հանրապետության համար։
«Նրա հանցավոր գործողությունները հանգեցրին Լեռնային Ղարաբաղի կորստին։ Նրա անփույթ դիվանագիտությունը անտեսեց ռազմագերիների գոյությունը։ Նրա ավտորիտար հակումները հանգեցրին այլախոհների ձերբակալությանը։ Նրա վարչակազմը խրախուսեց կոռուպցիայի նոր մակարդակ», – ասել է Աբրահամյանը։
Ինչպես կարծում է պատգամավորը, ստեղծված իրավիճակից միակ ելքը Կառավարության ղեկավարին անվստահություն հայտնելու գործընթացի սկիզբն է։
Ինչպես նշել է պատգամավորը, ընդդիմադիր ճամբարում, ընդհանուր առմամբ, ձևավորվել է որոշակի կոնսենսուս։ Կա պայմանավորվածություն գործող իշխանությունը «հարմարավետության գոտուց» դուրս բերելու քայլերի վերաբերյալ։
«Եկեք մի կողմ դնենք բոլոր տարաձայնությունները, քաղաքական շահերը, ամեն ինչ մանրամասն քննարկենք և համաձայնությունների հասնենք, որոնք թույլ կտան մեզ ավելի լայն կոնսենսուս ապահովել»,- առաջարկել է պատգամավորը։
Իր հերթին, ընդդիմադիր պատգամավոր, Հայաստանի Հանրապետական խմբակցության անդամ Հայկ Մամիջանյանը հայտնել է, որ լսումներին մասնակցելու համար գրանցվել էր 300 մարդ։ Նրանցից թույլատրվել է ներկա գտնվել միայն 160-ին։ Նա դա աննախադեպ է անվանել խորհրդարանի համար։
«Այսօր մենք պետք է պայքարենք ներկայիս վարչակազմի հակապետական քաղաքականության դեմ», – ասել է Մամիջանյանը։
Ինչպես նշել է ընդդիմադիր գործիչը, լսումների նպատակն է՝ գտնել ընդունելի և գործնական լուծումներ ստեղծված իրավիճակից դուրս գալու համար՝ ներգրավելով խորհրդարանական և արտախորհրդարանական ուժերի ջանքերը։
Միաժամանակ, «Հայ Ազգային Կոնգրես» (ՀԱԿ) խմբակցության փոխնախագահ Լևոն Զուրաբյանը հայտարարել է, որ իրենք մտադիր չեն դաշինք կազմել նախկին նախագահներ Ռոբերտ Քոչարյանի և Սերժ Սարգսյանի քաղաքական ուժերի հետ։
Միևնույն ժամանակ, Զուրաբյանը նշել է, որ Նիկոլ Փաշինյանի 7-ամյա կառավարման շրջանը երկիրը հասցրել է աղետալի հետևանքների։
«Սակայն, չնայած բազմաթիվ հակակառավարական շարժումներին և ակցիաներին, նրան այդպես էլ չհաջողվեց պաշտոնանկ անել»,- նշել է ընդդիմադիրը։
Պատճառը, ըստ ՀԱԿ-ի փոխնախագահի, այն է, որ ժողովուրդը չի ցանկանում մեկը մյուսով փոխարինել և աջակցել նախորդ իշխանություններին։
«Քանի դեռ մեր ժողովուրդը չի տեսնի մի շարժում, որի առաջնորդներին կվստահի և որոնք կունենան Հայաստանի փոխակերպման լուրջ ծրագիր, նա դուրս չի գա Փաշինյանի դեմ»,- ընդգծել է Զուրաբյանը։
Միևնույն ժամանակ, «Բարգավաճ Հայաստան» խմբակցության նախկին պատգամավոր Նաիրա Զոհրաբյանը հայտարարել է, որ վարչապետ Նիկոլ Փաշինյանը պատրաստ է գնալ ամենածայրահեղ քայլերին, հատկապես, երբ խոսքը վերաբերում է իշխանությունը պահելուն։ Այնուամենայնիվ, իմպիչմենթի գործընթացը, տեսականորեն, կարող է հաջողությամբ ավարտվել։
Զոհրաբյանի խոսքով՝ անվստահություն հայտնելու նախաձեռնությունը առանձնահատուկ նշանակություն ունի, քանի որ դա միակ քաղաքական օրակարգն է, որի շրջանակում «խաղի կանոնները Փաշինյանը չի թելադրում»։
Նախկին պատգամավորը որպես օրինակ բերել է Նեպալում և Ֆրանսիայում կառավարության փոփոխությունները, ընդգծելով, որ Հայաստանը պետք է ձգտի խաղաղ սցենարի։
«Փաշինյանն ինքը բաց խաղ է խաղում (խաղում է բաց խաղաթղթերով)։ Նա ցույց է տալիս, որ պատրաստ է գնալ ցանկացած քայլիի իր իշխանությունը պահելու համար։ Իշխանությունը պահելու հարցում Նիկոլ Փաշինյանը մահապարտ է»,- ասել է նախկին պատգամավորը։
Զոհրաբյանը նաև հայտարարել է «Քաղաքացիական պայմանագիր» իշխող խմբակցության պատգամավորներին պաշտպանելու պատրաստակամության մասին։ Նրանք ինչպես ինքն է արտահայտվել, դարձել են վարչապետի կողմից իրականացվող «քաղաքական ճնշման զոհեր»։
Համաձայն Հայաստանի գործող օրենսդրության, իմպիչմենթի նախաձեռնողները պարտավոր են առաջարկել իրենց թեկնածուին՝ վարչապետի պաշտոնի համար։ Գործընթացը սկսելու համար անհրաժեշտ է պատգամավորների 36 ստորագրություն, իսկ հաջող քվեարկության համար՝ նվազագույնը 54 ձայն՝ 107-ից։ Ընդդիմադիր «Հայաստան» խմբակցության տրամադրության տակ կա 28 ձայն, «Պատիվ ունեմ» դաշինքինը՝ 6 ձայն։ Մնացած ձայները ընդդիմադիրները ստիպված կլինեն ստանալ իշխող «Քաղաքացիական պայմանագիր» խմբակցության պատգամավորներից։
