«Հրապարակ» թերթը գրում է. «Հայոց ցեղասպանության թանգարան-ինստիտուտի տնօրենի ժամանակավոր պաշտոնակատար, նախկին դիվանագետ Հրաչյա Թաշչյանը, որ պատրաստակամություն է հայտնել Նիկոլ Փաշինյանի «գիծն» առաջ տանել, պարզվում է՝ Փաշինյանի աշխատակազմում օգնական աշխատելու ընթացքում մասնակցել է ադրբեջանական կողմի հետ գաղտնի բանակցություններին՝ 2018-2019 թթ․։
Հիշեցնենք, որ 2020 թվականի հուլիսի 9-ին էր, որ նա նշանակվեց վարչապետի աշխատակազմի արտաքին կապերի վարչության պետ՝ 3 տարի ժամկետով, իսկ 1․5 տարի անց՝ 2021 թ. դեկտեմբերին, Փաշինյանը նրան ազատեց, երբ արտահոսքեր կային այդ բանակցությունների մասին։ Նա գրագրության մեջ է եղել մասնավորապես Ադրբեջանի նախագահի աշխատակազմի արտաքին քաղաքական հարցերով բաժնի ղեկավար Հիքմեթ Հաջիևի հետ։
Ասում են՝ նույն պատրաստակամությամբ ծառայել է նաև նախկիններին․ մինչ Փաշինյանի օգնական նշանակվելը, պաշտոններ է զբաղեցրել ՀՀ ԱԳՆ-ում՝ ՆԱՏՕ-ի բաժնի վարիչ, ԱՄՆ-ում ՀՀ դեսպանության դեսպանորդ, ՀՀ կառավարության աշխատակազմի արտաքին կապերի վարչության պետ: Թաշչյանը ՀՀ արտակարգ դեսպանորդի և լիազոր նախարարի դիվանագիտական աստիճան ունի:
VERELQ-ը հիշեցնում է, որ ԱՄՆ փոխնախագահ Վենսը կնոջ հետ Ծիծեռնաբերդի հուշահամալիր էր այցելել փետրվարի 10-ին, գրառում էր կատարել Հայոց ցեղասպանության թանգարան-ինստիտուտի պատվավոր հյուրերի հուշամատյանում: Վենսին հուշահամալիր ուղեկցել էր Էդիտա Գզոյանը, նա նաև Արցախյան հիմնախնդրի մասին գիրք է նվիրել Վենսին։ Մեկ ամիս անց Էդիտա Գզոյանն ազատման դիմում ներկայացրեց, Նիկոլ Փաշինյանը հայտարարեց՝ իր ցուցումով է դա տեղի ունեցել, քանի որ « ղարաբաղյան շարժում չկա, օտարերկրյա հյուրին «Արցախյան հիմնահարց» թեմայով գիրք նվիրելն ի՞նչ է նշանակում »:
