Արքեպիսկոպոս Գալստանյանի և մյուսների գործով գործընթացը գտնվում է մեծ քաղաքական ճնշման տակ։ Այս մասին դատարանում հայտարարել է փաստաբան Հովհաննես Խուդոյանը:
Իրավաբանը նշել է, որ երեկ և այսօր խորհրդարանում հնչել են գործընթացին և մեղադրանքի էությանը վերաբերող տասնյակ հայտարարություններ, որոնք չեն համապատասխանում իրականությանը, խախտում են անմեղության կանխավարկածը և ցուցադրում են քաղաքական ճնշումը դատարանի նկատմամբ՝ անկախ նրանից, թե ում դեմ է այն ուղղված՝ դատարանի, դատախազության, թե հանրային կարծիքի:
«Հայտարարում եմ, որ նման ոճով հանդես եկած բոլոր անձինք ստախոս են և չեն կարող հաստատել իրենց խոսքերը։ Սա ուղղակի միջամտություն է գործընթացին և է՛լ ավելի մեծ կասկածի տակ է դնում օբյեկտիվությունը՝ չթողնելով արդարադատության որևէ հույս։ Ապագայում սա հիմք կդառնա ՄԻԵԴ-ում (Մարդու իրավունքների եվրոպական դատարան) գործի վերանայման համար։ Դատարանն ունի գործի կարճման գործիքակազմ, ինչի վերաբերյալ ես միջնորդություն կներկայացնեմ հետագայում։ Նման պայմաններում դատավարությունը շարունակվել չի կարող։ Գործում չկան փաստեր, որոնք կարող են հիմք հանդիսանալ նման հայտարարությունների համար», – ընդգծել է փաստաբանը։
News.am
