Ձեռնարկատեր և բարերար Սամվել Կարապետյանի փաստաբան Արմեն Ֆերոյանը սեպտեմբերի 15-ին կայացած ասուլիսի ժամանակ խիստ քննադատության է ենթարկել Արբիտրաժային դատարանի վերաբերյալ ՀՀ իշխանությունների դիրքորոշումը։ Ըստ նրա՝ այն պնդումը, թե քննարկվող հարցը «Հայաստանի ներքին գործն է», շատ վատ և անտեղի պատասխան է։
Մեկնաբանելով արդարադատության նախարար Սրբուհի Գալյանին վերագրվող հայտարարությունը՝ փաստաբանն ընդգծել է, որ պետությունն ինքն է ընտրել միջազգային արբիտրաժի ճանապհարհը։ Նա հիշեցրել է, որ հենց ՀՀ իշխանություններն են պայմանագիր կնքել Արբիտրաժային դատարանի հետ և ներդրողներին հրավիրել՝ երաշխավորելով, որ վեճերի ու տեղական դատարաններին չվստահելու դեպքում նրանք կարող են դիմել այդ ատյան։
«Պետությունն ինքն է ընտրել Արբիտրաժային դատարանը, ինքն է դրա հետ պայմանագիր կնքել, ողջ աշխարհին հայտնել, ներդրողներին հրավիրել և ասել նրանց, որ վեճի դեպքում, եթե չեք վստահում մեր դատարանին, դիմեք Արբիտրաժային դատարան։ Հիմա ասել, թե «դա մեր ներքին գործն է»՝ վատ պատասխան է», – ամփոփել է Արմեն Ֆերոյանը։
VERELQ-ն ավելի վաղ հայտնել էր, որ «Հայաստանի էլեկտրական ցանցեր» (ՀԷՑ) ընկերությունը Ստոկհոլմի առևտրային պալատի արբիտրաժային ինստիտուտում (SCC) հայց է ներկայացրել Հայաստանի կառավարության դեմ՝ ընկերության ազգայնացման պլանների պատճառով։ Նախնական գնահատականով՝ վնասի չափը կազմում է 500 միլիոն դոլար։ Արտակարգ արբիտրաժային վարույթի շրջանակում կայացվել է միջանկյալ որոշում։ Արբիտրաժային դատարանը Հայաստանի կառավարությանը պարտավորեցրել է ձեռնպահ մնալ ընկերության ազգայնացմանն ուղղված օրենսդրական փոփոխությունների կիրառումից, ինչպես նաև նրա ակտիվների բռնագրավմանն ուղղված ցանկացած հետագա քայլից։
Դատարանը նաև արգելել է ընկերության կառավարման փոփոխությունները և ՀԷՑ-ի բնականոն գործունեության սահմանափակումը։ Սակայն, չնայած դրան, Հայաստանի կառավարությունը հայտարարել է, որ ժամանակավոր կառավարիչ նշանակելը չի հակասում Ստոկհոլմի արբիտրաժի որոշմանը և ուղղված է ճգնաժամերի կանխարգելմանը և ընկերության աշխատանքում խախտումներ հայտնաբերելուն։ Հայաստանի արդարադատության նախարարությունը նշել է, որ արբիտրաժի որոշումը ժամանակավոր միջոց է և կարող է չկատարվել, եթե այն հակասում է Հայաստանի օրենսդրությանը և հասարակական կարգին։
Միաժամանակ, վարչապետ Նիկոլ Փաշինյանն աշխատանքից ազատեց միջազգային իրավական հարցերով ներկայացուցչի գրասենյակի ղեկավար Լիպարիտ Դրմեյանին։ Վերջինս հայտարարեց, որ ԵՀՕ-ի շրջանակներում արբիտրաժային որոշումը ենթակա է անհապաղ և պարտադիր կատարման կողմերի կողմից։
