Վրաստանի նախկին վարչապետ Իրակլի Ղարիբաշվիլին, ով ընդունել է ապօրինի եկամուտների օրինականացման գործով իր մեղքը, ձերբակալվել և տեղափոխվել է քրեակատարողական հիմնարկ: Այս մասին լրագրողներին հայտնել է նրա փաստաբան Միխայիլ Շակուլաշվիլին։
«Ղարիբաշվիլին արդեն ձերբակալված է։ Նրան հիմա տեղափոխում են բանտ», – հայտարարել է փաստաբանը՝ մանրամասնելով, որ պատժի կրման վայրն իրեն դեռ հայտնի չէ։
Այսօր ավելի վաղ Վրաստանի գլխավոր դատախազությունը հայտնել էր, որ Ղարիբաշվիլիի հետ դատավարական համաձայնագիր է կնքվել, որի շրջանակներում նա ընդունել է մեղքը: Դատարանը նրան դատապարտել է 5 տարվա ազատազրկման։ Բացի այդ, նախկին վարչապետը տուգանվել է 1 մլն լարիով (մոտ 370 հազար դոլար) և պարտավոր է պետությանը փոխանցել իր տան խուզարկության ընթացքում առգրավված դրամական միջոցները՝ մոտ 6,5 մլն դոլար:
Իրակլի Ղարիբաշվիլին Վրաստանի վարչապետի պաշտոնը զբաղեցրել է 2013-2015 և 2021-2024 թվականներին: 2024 թվականի հոկտեմբերին գլխավոր դատախազությունը նրան մեղադրանք է առաջադրել ապօրինի եկամուտներն օրինականացնելու համար։ Քննության տվյալներով` 2019-2021 թվականներին նա գաղտնի զբաղվել է ձեռնարկատիրական գործունեությամբ, ինչը պաշտոնատար անձանց արգելված է։
Այն ժամանակ Թբիլիսիի քաղաքային դատարանը Ղարիբաշվիլիի նկատմամբ խափանման միջոց էր ընտրել 1 միլիոն լարի գրավը։
Ավելի վաղ Վրաստանի պետական անվտանգության ծառայությունը հայտնել էր, որ տարբեր քրեական գործերի շրջանակներում Ղարիբաշվիլիի, ինչպես նաև պետական անվտանգության ծառայության նախկին ղեկավար Գրիգոլ Լիլուաշվիլիի, նախկին գլխավոր դատախազ Օթար Փարցխալաձեի և մի շարք այլ ֆիգուրանտների տներում ու բնակարաններում խուզարկություններ են անցկացվում: Քննչական գործողությունների ընթացքում առգրավվել է ավելի քան 7 միլիոն դոլար, 198 թանկարժեք ոսկերչական իր և ժամացույցներ, արժեքավոր նկարներ, փաստաթղթեր, ինչպես նաև 50 բջջային հեռախոս և 119 էլեկտրոնային սարք:
Sputnik Արմենիա
