Երևան քաղաքի վարչության օպերլիազոր Հայկ Հակոբյանի նկատմամբ կիրառվել է տնային կալանք խափանման միջոց` երկու ամիս ժամանակով։ Այս մասին Sputnik Արմենիային հայտնեցին ՀՀ քննչական կոմիտեից։
Ավելի վաղ Sputnik Արմենիային ՀՀ դատախազությունից հայտնել էին, որ ՀՀ ՆԳՆ ոստիկանության բաժանմունքում քաղաքացուն խոշտանգած ու նվաստացրած ոստիկանը կձերբակալվի։
Հիշեցնենք, որ ավելի վաղ համացանցում տեսանյութ էր տարածվել, որտեղ երևում էր, թե ինչպես է ենթադրաբար ոստիկանության բաժանմունքում օպերլիազորը խոշտանգում և հայհոյում տղամարդուն, որը, լրագրող Սյուզի Բադոյանի տեղեկություններով, ենթադրյալ հանցագործի հարազատն է։ Լրագրողը գրել էր, որ ոստիկանության Երևանի վարչության պետ Հայկ Հարությունյանի գիտությամբ և բաժիններից մեկի պետ Ռազմիկ Գասպարյանի թողտվությամբ, քրեականի օպերլիազոր Հայկ Հակոբյանը խոշտանգման եղանակով է ցուցմունք կորզել քաղաքացուց։
