ՀՀ քննչական կոմիտեն որոշել է չձերբակալել «Անտիֆեյք» կայքի աշխատակից Իշխան Խոսրովյանին։ Sputnik Արմենիային այս մասին հայտնեցին ՀՀ ՔԿ-ի մամուլի ծառայությունից։
Փաստաբան Ռուբեն Մելիքյանն առավոտյան հայտնել էր, որ գործընկերները չեն կարողանում կապ հաստատել Իշխան Խոսրովյանի հետ, հետո պարզվել էր, որ նրան ձերբակալել են։
Sputnik Արմենիայի տեղեկություններով` ոստիկանությունը Խոսրովյանին ձերբակալել էր և ներկայացրել քննչական մարմին։
«Անձը ներկայացվել է քննչական մարմին, սակայն որոշում է կայացվել չձերբակալել նրան»,- հայտնեցին ՔԿ-ից։
Փաստաբան Ռուբեն Մելիքյանը ֆեյսբուքյան էջում լուսանկար է հրապարակել՝ կից գրելով, որ Իշխան Խոսրովյանը բռնվելուց 6 ժամ անց ազատ է արձակվել։
«Նրան ժամը 8:30 տան բակից ձերբակալել էին «Արդարադատության իրականացմանը միջամտելուն օժանդակելու» տարօրինակ կասկածով»,- գրել է Մելիքյանը։
